Fana: At a Speed of Life!

ነገ በመዲናዋ ነጻ የታክሲ ትራንስፖርት አገልግሎት ይሰጣል

አዲስ አበባ፣ ነሐሴ 30፣ 2015 (ኤፍ ቢ ሲ) በነገው ዕለት የሚከበረውን የአገልጋይነት ቀን በማስመልከት በአዲስ አበባ ነጻ የታክሲ ትራንስፖርት አገልግሎት እንደሚሰጥ ተገለጸ

በመዲናዋ ከጠዋቱ 1 ሰዓት እስከ 3 ሰዓት ድረስ ነጻ የታክሲ የትራንስፖርት አገልግሎት እንደሚሰጥ አዲስ አበባ የ13 ሚኒባስ ታክሲና የሦስት ሃይገር ባስ ማኅበራት የጋራ ጥምር ኮሚቴ ገለጸ።

የጳጉሜን ወር ቀናት የዜጎችን የአብሮነት እሴት፣ የአገልጋይነት ባህልና ስሜትን እንዲሁም ሕብረ ብሔራዊ አንድነትን በሚያጸና መልኩ እንደሚከበሩ የመንግሥት ኮሙኒኬሽን አገልግሎት መግለጹ ይታወሳል።

በዚህም፥ ጳጉሜን 1- የአገልጋይነት ቀን፣ ጳጉሜን 2- የመስዋእትነት ቀን፣ ጳጉሜን 3- የበጎነት ቀን፣ ጳጉሜን 4- የአምራችነት ቀን፣ ጳጉሜን 5- የትውልድ ቀንና ጳጉሜን 6- የአብሮነት ቀን በሚል ተሰይመው ይከበራሉ።

በነገው ዕለት የሚከበረውን ጳጉሜን 1- የአገልጋይነት ቀን በማስመልከት ከጠዋቱ 1፡00 እስከ 3፡00 ሰዓት ነጻ የታክሲ ትራንስፖርት አገልግሎት እንደሚሰጥ የአዲስ አበባ የ13 ሚኒባስ ታክሲ እና የሦሥት ሃይገር ባስ ማኅበራት የጋራ ጥምር ኮሚቴ ገልጿል።

የጥምር ኮሚቴው አስተባባሪ አቶ አያሌው ስዩም እንደገለጹት፥ ዕለቱ ኢትዮጵያንና ሕዝቧን ለማገልገል ዘወትር ትራንስፖርት ለሚጠቀሙ ተገልጋዮች ምስጋና ለማቅረብ እድል የሚፈጥር ነው።

በመሆኑም በከተማዋ በሁሉም አቅጣጫ የታክሲ ትራንስፖርት የሚሰጡ ሚኒባስ ታክሲዎች ከጠዋቱ 1 ሰዓት እስከ 3 ሰዓት ድረስ የነጻ ትራንስፖርት አገልገሎት እንደሚሰጡም ነው የተናገሩት።

ለዚህም በ13 ቱም የታክሲ ማኅበራት የሚገኙ 5 ሺህ 250 ታክሲዎች አገልግሎቱን እንደሚሰጡ ጠቁመዋል።

የሚኒባስ ታክሲ አሽከርካሪዎች በበኩላቸው፥ በነገው ዕለት ከማለዳ ጀምሮ ነጻ የትራንስፖርት አገልግሎቱን ለመስጠት አስፈላጊውን ዝግጅት አድርገናል ብለዋል።

አገልገሎቱ በቂ ነው ባይባልም የአገልጋይነት መንፈስን ለመላበስና ኢትዮጵያዊ አንድነትን ለማጠናከር የሚያግዝ በመሆኑ በቀጣይም ይህንን ተግባር ለማጠናከር ፍላጎት እንዳላቸውም ነው የገለጹት።

የታክሲ አገልግሎቱን በተቀላጠፈ መልኩ ለማካሄድ የድርሻቸውን ለመወጣት ዝግጁ መሆናቸውን የገለጹት ደግሞ የመገናኛ ተርሚናል የታክሲ ተራ አስከባሪ ማኅበር ተወካይ ወጣት ትንቢት አበበ መግለጹን ኢዜአ ዘግቧል

#Ethiopia #AddisAbeba #freetransportation

ወቅታዊ፣ትኩስ እና የተሟሉ መረጃዎችን ለማግኘት፡-

ድረ ገጽ፦ https://www.fanabc.com/
ፌስቡክ፡- https://www.facebook.com/fanabroadcasting
ዩትዩብ፦ https://www.youtube.com/c/fanabroadcastingcorporate/
ቴሌግራም፦ https://t.me/fanatelevision
ትዊተር፦ https://twitter.com/fanatelevision በመወዳጀት ይከታተሉን፡፡
ኢንስታግራም፦ https://www.instagram.com/fana_television/
ቲክቶክ፦ https://www.tiktok.com/@fana_television

ዘወትር፦ ከእኛ ጋር ስላሉ እናመሰግናለን!

You might also like

Leave A Reply

Your email address will not be published.