Fana: At a Speed of Life!

የአገልጋይነት ቀንን በማስመልከት የታክሲ ትራንስፖርት አገልግሎት በነጻ ተሰጠ

አዲስ አበባ፣ ጳጉሜን 1፣ 2015 (ኤፍ ቢ ሲ) ጳጉሜን 1 የአገልጋይነት ቀንን በማስመልከት በዛሬው ዕለት በአዲስ አበባ የተለያዩ መስመሮች ነጻ የታክሲ ትራንስፖርት አገልግሎት መሰጠቱ ተገለጸ፡፡

የአዲስ አበባ የ13 ሚኒባስ ታክሲና የ3 ሃይገር ባስ ማኅበራት የጋራ ጥምር ኮሚቴ አስተባባሪ አቶ አያሌው ሥዩም፥ አገልግሎቱን ለመጀመር መነሻ ያደረግነው ዓመቱን በሙሉ የትራንስፖርት አገልግሎት የሚጠቀመውን ሕብረተሰብ ለማመስገን ነው ብለዋል፡፡

በተጨማሪም በአገልግሎት ተጠቃሚውና በአገልግሎት ሰጪው መካከል አንዳንዴ ሊያጋጥም የሚችልን አለመግባባትና ቅሬታ በይቅርታ ለማለፍ አገልግሎቱን መስጠት አስፈላጊ ሆኖ መገኘቱን ነው የተናገሩት፡፡

በተመሳሳይ ተገልጋዩ ሕብረተሰብ በነጻ ያገኘውን አገልግሎት በተሰማራበት ሁሉ በነጻ ወይም በተነሳሽነት እንዲያደርገው ምሳሌ ለመሆንም ጭምር እንደሆነም ገልጸዋል፡፡

ሁላችንም ተገልጋይም አገልጋይም ነን ያሉት አቶ አያሌው፥ የምንሰጠው አገልግሎት ብቻ ሣይሆን ይቅርታና መተሳሰብንም ጭምር ነውም ብለዋል፡፡

ቀኑን በማስመልከት ከጠዋቱ 1፡00 እስከ 3፡00 ሰዓት ነጻ የታክሲ ትራንስፖርት አገልግሎት ሲሰጥ ፥ በ13ቱም የታክሲ ማኅበራት የሚገኙ ከ5 ሺህ በላይ ታክሲዎች እንደተሰማሩም ገልጸዋል፡፡

ላለፉት 3 ዓመታት በአንድ ታክሲ የጀመረው ነጻ የትራንስፖርት አገልግሎት መስጠት ተግባር ዛሬ በርካታ የትራንስፖርት አገልግሎት ሰጪ በጎ ፈቃደኞችን እንዳፈራ ጠቅሰዋል።

በዚህም ዛሬ በተሰጠው አገልግሎት የታዩ ክፍተቶችን በመገንዘብ በቀጣይ በማሻሻል አገልግሎቱን ቀልጣፋ እና ከዚህ የበለጠ ውጤታማ በማድረግ ህብረተሰባችንን እናገለግላለን ሲሉ ለፋና ብሮድካስቲንግ ኮርፖሬት ገልጸዋል፡፡

በመሰረት አወቀ

You might also like

Leave A Reply

Your email address will not be published.