Fana: At a Speed of Life!

ርዕሰ መሥተዳድር አረጋ ከበደ ከተመድ ተወካዮች ጋር ተወያዩ

አዲስ አበባ፣ ጳጉሜን 1፣ 2015 (ኤፍ ቢ ሲ) የአማራ ክልል ርዕሰ መሥተዳድር አረጋ ከበደ እና የክልሉ የካቢኔ አባላት ከተባበሩ መንግሥታት የተለያዩ ድርጅቶች ተወካዮች ጋር ተወያይተዋል፡፡

ርዕሰ መስተዳድሩ በውይይቱ÷በሰሜን ኢትዮጵያ በነበረው ጦርነት የደረሰውን ውድመት መልሶ ለመገንባት የረጅ ድርጅቶች ሚና ተጠናክሮ እንዲቀጥል ጠይቀዋል፡፡

በአማራ ክልል የወደሙ መሰረተ ልማቶችን እና የደረሱ ሰብዓዊ እና ኢኮኖሚያዊ ቀውሶችንም ለተመድ ተወካዮች አስረድተዋል።

በጦርነቱ ከፍተኛ ሃብት መውደሙን ጠቅሰው÷ዘርፈ ብዙ ሰብዓዊ ቀውሶች መድረሳቸውንም ነው ርዕስ መስተዳድሩ የገለጹት፡፡

የደረሱ ውድመቶችን መልሶ ለመገንባት እየተሰራ ነው ያሉት ርዕሰ መስተዳድሩ÷ የደረሰው ጉዳት መጠነ ሰፊ በመሆኑ የረጅ ድርጅቶች ሚና ይበልጥ መጠናከር አለበት ብለዋል፡፡

የክልሉ መንግሥት 1 ቢሊየን ብር መድቦ ትምህርት ቤቶችን፣ ጤና ጣቢያዎችንና የውኃ ተቋማትን እየገነባ ቢሆንም ከደረሰው ጉዳት አንጻር በቂ አለመሆኑን ጠቅሰዋል።

የደረሰውን ኢኮኖሚያዊ እና ሰብዓዊ ቀውስ መልሶ በመገንባቱ ረገድ የረጅ ድርጅቶች ሚና የሚጠበቀውን ያህል እንዳልነበርም ለተወካዮች አስረድተዋል።

ክልሉ በትኩረት ለሚሠራው የኢኮኖሚ ልማትም ኤጀንሲዎች የበኩላቸውን ድጋፍ እንዲያደርጉ መልዕክት አስተላልፈዋል።

በውይይቱ ላይ የተሳተፉ የተመድ ተወካዮችም በክልሉ ውስጥ ለተከሰቱ ችግሮች ሰብዓዊ እርዳታዎችን እንደሚያቀርቡና ለዘላቂ ልማት አጋር ሆነው እንደሚሠሩ መግለጻቸውን አሚኮ ዘግቧል፡፡

የተባበሩት መንግሥታት የሰብዓዊ እርዳታ አስተባባሪ ራሚዝ አልአክባሮቭ (ዶ/ር) ÷ድርጅቱ በክልሉ ሰብዓዊ ድጋፍ አቅርቦትና የዘላቂ ልማት ሥራዎች ላይ በትኩረት እንሚሠራ ተናግረዋል።

በግብርና ሥራ፣ በመጠጥ ውኃ አቅርቦት፣ በጤና እና በሌሎችም የልማት ሥራዎች ላይ የአጋርነት ሥራዎችን እናከናውናለን ሲሉም ገልጸዋል።

You might also like

Leave A Reply

Your email address will not be published.