Fana: At a Speed of Life!

የጤና አገልግሎቱን ውጤታማ የሚያደርግ የብሔራዊ መታወቂያ አገልግሎት ገቢራዊ ሆነ

አዲስ አበባ፣ ጳጉሜን 1፣ 2015 (ኤፍ ቢ ሲ) የጤና አገልግሎት አሰጣጡን ቀልጣፋና ውጤታማ ማድረግ የሚያስችል የብሔራዊ መታወቂያ አገልግሎት ተግባራዊ ማድረጉን የጤና ሚኒስቴር አስታወቀ፡፡

የጤና ሚኒስቴር ከብሔራዊ መታወቂያ ፕሮግራም ጋር በመሆን አገልግሎቱን በተመለከተ መግለጫ ሰጥተዋል።

የጤና ሚኒስትር ዶክተር ሊያ ታደሰ÷ “ፋይዳ” በተባለው የብሔራዊ ዲጂታል መታወቂያ አማካኝነት የጤናውን ዘርፍ አገልግሎት አሰጣጥ ለማሻሻል ያግዛል ማለታቸውን ኢዜአ ዘግቧል፡፡

የብሔራዊ የዲጂታል መታወቂያ በጤናው ዘርፍ ገቢራዊ በማድረግ ጥራት ያለውና ቀልጣፋ አገልግሎት ከመስጠትም ባሻገር የታካሚዎችን የመረጃ አስተዳደር ለማዘመን የጎላ ፋይዳ አለው ብለዋል።

በኢትዮጵያ የጤና መረጃ አያያዝን ለማዘመን የዲጂታል ብሔራዊ መታወቂያ ወሳኝ መሆኑን ጠቅሰው÷ ከ17 ሺህ በላይ ጤና ኬላዎች ዲጂታላይዝድ ለማድረግ እንቅስቃሴ መጀመሩን አስታውቀዋል፡፡

የጤናውን ዘርፍ ከብሔራዊ መታወቂያ ጋር በማቀናጀት ብሔራዊ የጤና መድህን ስርዓት፣ የጤና ባለሙያዎች ፈቃድ አሰጣጥ፣ የጋራ የጤና ማህደርና መሰል አገልግሎት ማበልፀግ ያስችላል ነው ያሉት፡፡

የብሔራዊ መታወቂያው አስተማማኝና የትክክለኛ ማንነት ማረጋገጫ በመሆኑ የጤና አገልግሎት ክፍያ ስርዓትን ያቀላጥፋል፤ ከማጭበርበርም ይታደጋል ብለዋል ሚኒስትሯ።

የብሔራዊ መታወቂያ ፕሮጀክት ዋና ስራ አስኪያጅ ዮዳሄ ዘሚካኤል እንዳሉት÷ በኢትዮጵያ ዲጂታል መታወቂያ አዋጅ ቁጥር 1284/2015 መሰረት በተለያዩ መስሪያ ቤቶች ያሉ የግለሰቦችን ሰነድ በቀላሉ በአንድ ላይ መያዝ ይችላል።

የብሔራዊ ዲጂታል መታወቂያ የግለሰቦችን ትክክለኛ ማንነት በመለየት የሚይዝ በየትኛውም ተቋም ቢሄዱ ያለምንም እንግልት በመለያ ቁጥራቸው አማካኝነት አገልግሎት የሚያገኙበት መሆኑንም አስረድተዋል፡፡

በመሆኑም ተቋማት መታወቂያውን ገቢራዊ የሚያደርጉት በፍላጎት በመሆኑ የጤና ሚኒስቴር የጤናውን ዘርፍ ለማዘመን ለጀመረው የዲጂታል የመረጃ አያያዝ አገልግሎት ጥቅም ላይ አውሎታል ሲሉ ገልጸዋል፡፡

#Ethiopia

ወቅታዊ፣ትኩስ እና የተሟሉ መረጃዎችን ለማግኘት፡-
ድረ ገጽ፦ https://www.fanabc.com/
ፌስቡክ፡- https://www.facebook.com/fanabroadcasting
ዩትዩብ፦ https://www.youtube.com/c/fanabroadcastingcorporate/
ቴሌግራም፦ https://t.me/fanatelevision
ትዊተር፦ https://twitter.com/fanatelevision በመወዳጀት ይከታተሉን፡፡
ኢንስታግራም፦ https://www.instagram.com/fana_television/
ቲክቶክ፦ https://www.tiktok.com/@fana_television

ዘወትር፦ ከእኛ ጋር ስላሉ እናመሰግናለን!

You might also like

Leave A Reply

Your email address will not be published.