Fana: At a Speed of Life!

ኢትዮጵያ በዘመናት ሂደት ትውልዶች በአኩሪ ገድላቸው ያፀኗት የጋራ ቤታችን ናት – የመንግሥት ኮሙኒኬሽን አገልግሎት

አዲስ አበባ፣ ጳጉሜን 2፣ 2015 (ኤፍ ቢ ሲ) ኢትዮጵያ በዘመናት ሂደት ትውልዶች በአኩሪ ገድላቸው ያፀኗት የጋራ ቤታችን ናት ሲል የመንግሥት ኮሙኒኬሽን አገልግሎት ገለጸ፡፡

የመንግሥት ኮሙኒኬሽን አገልግሎት ጳጉሜን 2 የመስዋዕትነት ቀን አስመልክቶ መልዕክት አስተላልፏል፡፡

የመልዕክቱ ሙሉ ቃልም እንደሚከተለው ቀርቧል፡-

በመሥዋዕትነት የምትፀና ሃገር፡ ኢትዮጵያ!

ኢትዮጵያ በዘመናት ሂደት ትውልዶች በአኩሪ ገድላቸው ያፀኗት የጋራ ቤታችን ናት።

ይህቺን የጋራ ቤታችንን ዛሬ ላይ መረከብ የቻልነው የሀገራችን ጀግኖች በከፈሉት አኩሪ የተጋድሎ መስዋዕትነት ነው።

የዛሬውን ጳጉሜን 2 ስናከብር ከትላንት እስከ ዛሬ የኢትዮጵያን አንድነትና ሉዓላዊነት ለማስከበርና ለማፅናት የተከፈለውን መሥዋዕትነት በማሰብ ነው፡፡

ለሃገራችን ኢትዮጵያ በየዘመኑ ለክብሯና ሉዓላዊነቷ የተከፈለላት መስዋዕትነት ዘመን ተሻጋሪ የሀገረ መንግሥት ግንባታ እንድታዳብር አድርጓታል። ሕብረብሔራዊ አንድነቷ እንዲጠናከርም መሠረት ጥሏል።

ለሀገር አንድነት፣ ለዴሞክራሲያዊ ሥርዓት ግንባታና ለእውነተኛ ፌደራሊዝም የተከፈሉ መስዋዕትነቶች ዛሬ ላይ እጅግ ብዙ ፍሬዎችን አፍርተዋል፡፡

በአሁኑ ወቅት የኢትዮጵያን ሰላም ለማረጋገጥ፣ የሀገርን አንድነት ለማስቀጠል እንዲሁም ሁለንተናዊ ብልፅግናን ለማረጋገጥ በየዘርፉ መስዋዕትነት እየተከፈለ ነው።

በተለይም፤ የሕዝብ መከታ፣ የሀገር አለኝታ የኾነው ጀግናው የመከላከያ ሰራዊታችን የመጨረሻው የሀገራችን ምሽግ ኾኖ በመስዕዋትነት ሃገራዊ አንድነትን እያፀና ይገኛል።

የፌደራልና የክልል የፖሊስ፣ የፀጥታና ደህንነት ሃይሎች በሙሉ ኢትዮጵያን ለማፅናት በየቀኑ መሥዋዕትነት እየከፈሉላት ይገኛሉ፡፡

ሀገርን እና ሕዝብን ወደ ላቀ የብልጽግና ከፍታ ለማሻገርና ብሔራዊ ጥቅማችንን አስከብሮ ማቆየት የሚቻለው ለሀገር በሚከፈል መስዋዕትነት ነው። ማዕከላዊ የዕዝ ሰንሰለቱ የተጠበቀ ሀገራዊ የፀጥታ መዋቅር እንዲጠናከር የሚከፈለውን ሃገራዊ መስዋዕትነት መገንዘብና ዕውቅና መስጠት ያስፈልጋል።

የ2015 ጳጉሜን 2 የመስዋዕትነት ቀንን ስናከብር ጀግኖቻችን የከፈሉትን መስዕትነት ማክበርና መዘከር ይገባል። ሃገር ከዜጎቿ የምትጠይቀውን ሁሉ ለማበርከት የሚጠበቅብንን መስዋዕትነት ለመክፈል መዘጋጀት ይገባል።

በተለይም ኢትዮጵያዊያን በተለያዩ ሕጋዊ የፀጥታ መዋቅር ውስጥ ኾነው ለሀገር ሰላምና ለሕዝብ ደህንነት መስዋዕትነት እየከፈሉ ላሉ የፀጥታ ኃይሎች እንደተለመደው ፍቅሩን፣ ድጋፉንና አብሮነቱን አጠናክሮ ሊቀጥል ይገባል።

መላው ኢትዮጵያዊያን እንኳን ለጳጉሜን 2/2015 የመስዋዕትነት ቀን አደረሳችሁ!

ኢትዮጵያ በልጆቿ መስዋዕትነት ታፍራና ተከብራ ለዘላለም ትኖራለች!

የመንግሥት ኮሙኒኬሽን አገልግሎት

 

You might also like

Leave A Reply

Your email address will not be published.