Fana: At a Speed of Life!

በሀረሪ ክልል የበጎነት ቀን በተለያዩ ዝግጅቶች ተከበረ

አዲስ አበባ፣ ጳጉሜን 3፣ 2015 (ኤፍ ቢ ሲ) “በጎነት ለሀገር” በሚል መሪ ሀሳብ የበጎነት ቀን በተለያዩ ዝግጅት በሀረሪ ክልል ተከብሯል።

በዝግጅቱ ላይ የክልሉ ርዕሰ መስተዳድር አቶ ኦርዲን በድሪን ጨምሮ ሌሎች ከፍተኛ አመራሮች ተገኝተዋል።

ርዕሰ መስተዳድሩ ባስተላለፉት መልዕክት በጎ ማድረግ በሀብት መጠን የሚደረግ ተግባር ሳይሆን ሁሉም በሚችለው አቅም ማድረግ የሚገባ ተግባር ነው ብለዋል።

ዘር፣ ቀለምና ሀይማኖት ሳይለዩ መደገፍ እንደሚገባ ገልጸው፤ በክልሉ የሚገኙ ድጋፍ የሚያስፈልጋቸው በርካታ ወንድም እህቶችና አረጋውያንን ማገዝና መደገፍ ከሁሉም ይጠበቃል ሲሉ ተናግረዋል።

በጎነት ለራስ መሆኑን ጠቅሰው፤ በጎ ማድረግ ለለጋሹ ከፍተኛ የመንፈስ እርካታና ደስታን የሚያጎናጽፍ ተግባር ስለመሆኑ ገልጸዋል።

በክልሉ ለሚገኘው የአረጋውያንና አካል ጉዳተኞች ተሃድሶ ማዕከል የሚደረገው ድጋፍ ተጠናክሮ እንደሚቀጥልም አረጋግጠዋል።

ከዚህ ባሻገርም ድጋፍ የሚያስፈልጋቸው ዜጎችን በመደገፍ ረገድ ሚናቸውን ማጎልበት ይገባል ያሉት ርዕሰ መስተዳድሩ በጎ ማድረግም የአንድ ቀን ሳይሆን የየለት ተግባር ማድረግ እንደሚገባ ማስገንዘባቸውን የክልሉ ኮሙኒኬሽን ቢሮ ዘገባ አመልክቷል።

በእለቱም በክልሉ በሚገኘው በሚገኘው አብርሃ ባህታ የአረጋውያንና አካል ጉዳተኞች ማዕከል እንዲሁም ለተማሪዎች እና አካል ጉዳተኞች የዊልቸር፣ የመማሪያ ቁሳቁስ፣ መደገፊያ (ክራንች)፣ የንፅህና መጠበቂያ ቁሳቁስ ድጋፍ የተደረገ ሲሆን የአልባሳት፣ የደም ልገሳና የጤና ምርመራ፣ የቤት እድሳት ተደርጓል።

You might also like

Leave A Reply

Your email address will not be published.