Fana: At a Speed of Life!

የኢትዮጵያና ደቡብ አፍሪካ ወታደራዊ ትብብሮች ተጠናክረው እንደሚቀጥሉ ተገለጸ

አዲስ አበባ፣ ጳጉሜን 3፣ 2015 (ኤፍ ቢ ሲ) የኢትዮጵያ እና ደቡብ አፍሪካ ወታደራዊ ትብብሮች እንዲሁም የልምድ ልውውጦች ተጠናክረው እንደሚቀጥሉ ፊልድ ማርሻል ብርሃኑ ጁላ ገለጹ፡፡

የኢ.ፌ.ዲ.ሪ የጦር ሃይሎች ጠቅላይ ኢታማዦር ሹም ፊልድ ማርሻል ብርሃኑ ጁላ ከልዑካን ቡድናቸው ጋር በደቡብ አፍሪካ የነበራቸውን የስራ ጉብኝት አጠናቀው ተመልሰዋል፡፡

ፊልድ ማርሻል ብርሃኑ ጁላ በቆይታቸውም÷ ከደቡብ አፍሪካ የመከላከያ ሚኒስትር ታንዲ ሞዲሴ፣ ከመከላከያ ሰራዊት ዋና አዛዥ ጄነራል ሩድዛኒ ማፍዋንያ፣ ከአየር ሃይልና ልዩ ሃይል ዋና አዛዦች፣ የጦር መሳሪያ እና ቴክኖሎጂ ላይ ከተሰማሩ ኩባንያዎች አመራሮች ጋር መክረዋል፡፡

ፊልድ ማርሻል ብርሃኑ ጁላ በዚሁ ወቅት÷ የሁለቱ ሀገራት ግንኙነት ረዥም ዘመናትን ያስቆጠረና ታሪካዊ መሆኑን ጠቅሰው፤ ኢትዮጵያ በጸረ አፓርታይድ ትግል ወቅት ለደቡብ አፍሪካ ነጻነት ታጋዮችና አመራሮች ስልጠናና ድጋፍ እንደሰጠች ገልጸዋል፡፡

በቀጣይም የሀገራቱ ወታደራዊ ትብብሮችና የልምድ  ልውውጦች ተጠናክረው እንደሚቀጥሉ ነው የገለጹት፡፡

የደቡብ አፍሪካ የመከላከያ ሰራዊት ዋና አዛዥል ሩድዛኒ ማፍዋንያ በበኩላቸው÷ ኢትዮጵያ የፓን አፍሪካኒዝም ጀማሪ፣ በቅኝ ግዛት ያልተገዛች እንዲሁም ሌሎች አፍሪካውያን ነጻ እንዲወጡ ፈር ቀዳጅና እገዛ ያደረገች መሆኗን ጠቅሰዋል፡፡

የልዑካን ቡድኑ በቆይታው የማካዶን አየር ኃይልና ፋላቦርዋ የልዩ ሃይል ማሰልጠኛ ማዕከል ተገኝቶ ዘመናዊ የአየር ሀይል አውሮፕላኖችን እንዲሁም የልዩ ሃይል አደረጃጀቶችንና ትጥቆችን ጎብኝቷል።

ቡድኑ የአፓርታይድ ሙዚየምና ኔልሰን ማንዴላ ከመታሰራሳቸው በፊት ይኖሩ የነበረበትን ታሪካዊ መኖሪያ ቤትም ጎብኝቷል፡፡

በተጨማሪም አፓርታይድ ሙዚየም ውስጥ የሚገኘውን ኢትዮጵያ ለኔልሰን ማንዴላ ያስታጠቀችውን ሽጉጥና የሰጠችውን የኢትዮጵያ ፓስፓርትም መመልከት እንደቻለ ተጠቅሷ፡፡

በተጨማሪም የልካን ቡድኑ ደቡብ አፍሪካ ውስጥ ከሚገኙ የጦር መሳሪያና ቴክኖሎጂ ምርት ላይ ከተሰማሩ ኩባንያዎች ጋር በወታደራዊ ቴክኖሎጂዎች ዙሪያ መምከራቸውን በፕሪቶሪያ የኢትዮጵያ ኤምባሲ መረጃ ያመላክታል፡፡

You might also like

Leave A Reply

Your email address will not be published.