Fana: At a Speed of Life!

“የትውልድ ቀን” በተለያዩ ዝግጅቶች ተከበረ

አዲስ አበባ ፣ ጳጉሜን 5 ፣ 2015 (ኤፍ ቢ ሲ) ‘የትውልድ ቀን’ በተለያዩ የሀገሪቱ አካባቢዎች ተከብሯል።

የዛሬው የጳጉሜ 5 የትውልድ ቀን “ኢትዮጵያ የትውልዶች ድምር” በሚል መሪ ቃል የፓናል ውይይትን ጨምሮ በተለያዩ መርሐ ግብሮች በቤኒሻንጉል ጉሙዝ ክልል ተከብሯል፡፡

በመድረኩ የተገኙት የክልሉ ርዕሰ-መስተዳድር አቶ አሻድሊ ሀሰን ትውልድን መቅረጽ ሀገርን በማስቀጠል ሂደት ቀዳሚ አስተዋጽኦ ያለው በመሆኑ ከሁሉም የቀደመ ርብርብ ይፈልጋል ብለዋል።

በአግባቡ የተማረ ትውልድ ራሱን፣ ቤተሰቡንና ሀገሩን ይጠቅማል ያሉት አቶ አሻድሊ ለዚህም መንግስት ትኩረት ሰጥቶ እየሠራ መሆኑን ተናግረዋል።

በተመሳሳይ በጋምቤላ እየተከበረ ሲሆን የክልሉን ርዕሰ መስተዳድር በመወከል ንግግር ያደረጉት አቶ ጁል ናንጋል፥ በስልጣኔ ጥግ የደረሱ ሀገራት ለትምህርት ከፍተኛ መዋዕለ ንዋይ በማፍሰስና ለዘርፉ ትኩረት በመስጠት አሁን ያሉበት ላይ መድረሳቸውን አንስተዋል።

መንግስት ብዝሃ ልሳን የሆነ ማህበረሰብ ለመገንባት በሚያደርገው ጥረት በክልሉ የሚገኙ ብሄረሰቦች በቋንቋቸው ከመጠቀም ባለፈ ቋንቋቸው እየዳበረ እንዲመጣ ሰፊ ስራ መሰራቱን ገልፀዋል።

 

በመሆኑም ኢትዮጵያን የትውልዶች ድምር ውጤት ለማድረግ በሚሰራው ስራ ከመምህራን፣ የትምህርት ዘርፉ አመራርና ባለሙያዎች ከፍተኛ ርብርብ እና ዕገዛ ይጠበቃል ማለታቸውን የክልሉ መንግስት ኮሙኒኬሽን መረጃ ያመላክታል።

You might also like

Leave A Reply

Your email address will not be published.