Fana: At a Speed of Life!

የቄራዎች ድርጅት ለበዓሉ ጤንነቱ የተረጋገጠ የእርድ አገልግሎት ለመስጠት ዝግጅት ማጠናቀቁን ገለጸ

አዲስ አበባ ፣ ጳጉሜን 5 ፣ 2015 (ኤፍ ቢ ሲ) ለዘመን መለወጫ በዓል ጤንነቱ የተረጋገጠ የእንስሳት እርድ አገልግሎት ለመስጠት ዝግጅት ማጠናቀቁን የአዲስ አበባ ቄራዎች ድርጅት አስታወቀ፡፡

የድርጅቱ የሕዝብ ግንኙነት ዳይሬክተር አታክልቲ ገ/ሚካኤል ለፋና ብሮድካስቲንግ ኮርፖሬት እንዳሉት÷ ለ2016 አዲስ ዓመት በዓል ከ5 ሺህ በላይ የእርድ እንስሳትን ለማቅረብ ዝግጅት ተደርጓል፡፡

ቀልጣፋና ጥራቱን የጠበቀ አገልግሎት ለመስጠት ከሰራተኞች ጋር ውይይት መደረጉን ጠቅሰው÷ የእርድ ማዕከላትም አስፈላጊው እድሳት እና ጥገና ተደርጎላቸዋል ብለዋል፡፡

የሥርጭት አገልግሎቱን ለማሳለጥም በቂ ተሽከርካሪዎች ዝግጁ መደረጋቸውን ነው ዳይሬክተሩ የተናገሩት፡፡

ጤንነቱ የተረጋገጠ የእርድ አገልግሎት ለመስጠት የድርጅቱ ባለሙያዎች በእንስሳቶቹ ላይ አስፈላጊውን ምርመራ እንደሚያከናውኑ አንስተዋል፡፡

ድርጅቱ የእርድ አገልግሎቱን በአዲስ አበባ ከተማ ለሚገኙ ሁሉም ልኳንዳ ቤቶች እንደሚሰጥና የመሸጫ ሱቆችም ዝግጁ መደረጋቸውን አንስተዋል፡፡

በአንጻሩ አንዳንድ ስግብግብ ነጋዴዎች ግብር ላለመክፈል ሲሉ በሕገ-ወጥ እርድ እንስሳትን ሊያቀርቡ እንደሚችሉ ጠቁመዋል፡፡

ዜጎች መሰል ድርጊት ሲመለከቱ ለጸጥታ አካላት እንዲያሳውቁ ጠቁመው÷ለበዓሉም እርዱ በቄራ የተፈጸመና ጤንነቱ የተጠበቀ መሆኑን ማረጋገጥ እንዳለባቸው አሳስበዋል፡፡

በመላኩ ገድፍ

You might also like

Leave A Reply

Your email address will not be published.