Fana: At a Speed of Life!

አዲሱ ዓመት የልዩነትን አጥር አፍርሰን የአንድነት ሐውልት ለመትከል የምንተጋበት ዘመን ይሆናል – አፈ-ጉባዔ አገኘሁ ተሻገር

አዲስ አበባ፣ ጷጉሜን 6፣ 2015 (ኤፍ ቢ ሲ) የፌዴሬሽን ምክር ቤት አፈ -ጉባዔ አገኘሁ ተሻገር ለ2016 የዘመን መለወጫ በዓል የእንኳን አደረሳችሁ መልዕክት አስተላልፈዋል፡፡

በመልዕክታቸውም÷ አዲስ ዓመት አዲስ ተስፋ የሚጸነስበት፤ ካሳለፍነው ችግርና ስኬት በመማር ለተሻለ ለውጥና ለአዲስ ተስፋ ራሳችንን የምናዘጋጅበት ነው ብለዋል፡፡

ቀጣዩ ዓመት እንደሀገር ለድሕነት የዳረጉንን ችግሮች ተሻግረን በፍቅር እጅ ለእጅ ተያይዘን ለአንድ ሀገራዊ አላማ የምንቆምበትና ለተግባራዊነቱም ያለእረፍት የምንሠራበት ይሆናልም ብለዋል።

አሁን ላይ የሕዝቦችን ደኅንነት የሚያውኩ፣ ከቦታ ቦታ ተዘዋውሮ የመሥራት መብትን የሚገድቡና እንደሀገር የብልጽግና ጉዞን ወደኋላ የሚጎትቱ ክስተቶች እንደሚስተዋሉ አንስተዋል፡፡

ለእነዚህ ችግሮች በዋናነት ለረዥም ዘመናት ምላሽ ሳያገኙ ሲንከባለሉ የመጡ የሕዝቦች እኩል የመልማት፣ ፍትሕ የማግኘትና ማንነቴ ይከበርልኝ ጥያቄዎች መሆናቸውን አጽንኦት ሰጥተዋል፡፡

ምክር ቤቱ እነዚህን ጥያቄዎች በቅደም ተከተል ለመመለስ እቅዶ እየተንቀሳቀሰ ነው ያሉት አፈ ጉባዔው÷ ከአዲሱ ዓመት ጀምሮ በተጠናና የሀገር አንድነትን በሚያጸና መልኩ ምላሽ ለመስጠት እንደሚሠራ አረጋግጠዋል፡፡

አፈ-ጉባዔ አገኘሁ አዲሱ ዓመት አሮጌውን የልዩነት አጥር አፍርሰን አዲስ የአንድነት ሐውልት ለመትከል የምንተጋበት ዘመን ይሆናል ሲሉም መልካም ምኞታቸውን ገልጸዋል፡፡

You might also like

Leave A Reply

Your email address will not be published.