Fana: At a Speed of Life!

“ጠቃሚውን በማጠናከር አዲሱን ዓመት መቀበል አለብን” – አቡነ ማትያስ

አዲስ አበባ፣ ጳጉሜን 6፣ 2015 (ኤፍ ቢ ሲ) ብፁዕ ወቅዱስ አቡነ ማትያስ ቀዳማዊ ፓትርያርክ ርዕሰ ሊቃነ ጳጳሳት ዘኢትዮጵያ ሊቀ ጳጳስ ዘአክሱም ወዕጨጌ ዘመንበረ ተክለ ሃይማኖት የ2016 ዓ.ም የዘመን መለወጫ በዓልን በማስመልከት ለመላው የኢትዮጵያ ሕዝብ እንኳን አደረሳችሁ መልዕክት አስተላልፈዋል፡፡

በመልዕክታቸውም÷ “ዘመንን በዘመን እየተካ ፍጥረቱን የሚመግብና የሚመራ እግዚአብሔር አምላካችን እንኳን ከዘመነ ሉቃስ ወደ ዘመነ ዮሐንስ በሰላም አደረሰን፤ አደረሳችሁ” ብለዋል፡፡

ዘመናት ሰው በሰላም ሠርቶ ሕይወቱን በአግባቡ ሊመራባቸው፣ ፈጣሪውን ሊያመልክባቸው፣ ሊማርባቸውና ዕውቀት ሊገበይባቸው፣ ሲሳሳትም ንስሐ ገብቶ ሊታረምባቸው የተሰጡ ጸጋዎች ስለሆኑ ዓመታትን በዚህ አግባብ መጠቀም መልካም መሆኑን አንስተዋል፡፡

የተወደዳችሁ የመንፈስ ቅዱስ ልጆቻችን÷ ያለፈውን ጎጂ ነገር በመተው ጠቃሚውን ግን ይበልጥ በማጠናከር አዲሱን ዓመት መቀበል አለብን ብለዋል በመልዕክታቸው፡፡

“ትልቁ የእግዚአብሔር ፈቃድ ከቂም ከበቀል ርቀን ስራችንን በፍቅርና በስምምነት፣ በትዕግሥትና በምክክር እንድንሰራ ነው” ሲሉም ገልጸዋል፡፡

በመለያየት፣ መበቃቀል፣ መናናቅ፣ የራስን ጥቅም ብቻ ለማስጠበቅ በመጣር የሕዝብን ጥቅም ማስከበርና የሀገርን አንድነት ማስቀጠል ስለማይቻል÷ እነዚህ አስተሳሰቦች ከአሮጌው ዓመት ጋራ አብረው መወገድ አለባቸውም ነው ያሉት።

ችግሮችን በውይይት እና በሕግ እየፈቱ የሀገርና የሕዝብ አንድነት መረጋገጥ እንዳለበትም አስገንዝበዋል፡፡

“አዲሱ ዓመት የሰላም፣ የፍቅር፣ የዕርቅ፣ የይቅርታ፣ የተፈናቀለው ወደቀየው የሚመለስበት፣ ሆድ የባሰው የሚጽናናበት፣ ፍትሕና ርትዕ የሚሰፍንበት፣ የመሳሪያ ድምፅ የማይሰማበት፣ ፍጹም የተግባቦት ዓመት እንዲሆንልን እየጸለይን ኢትዮጵያውያን ልጆቻችን ለዚህ ቅዱስ ጥሪ አዎንታዊ መልስ እንድትሰጡ አባታዊ መልዕክታችንን በእግዚአብሔር ስም በድጋሚ እናስተላልፋለን” ብለዋል፡፡

የኢትዮጵያ እስልምና ጉዳዮች ጠቅላይ ምክር ቤት ፕሬዚዳንት ሼህ ሀጂ ኢብራሂም ቱፋ በበኩላቸው÷ አዲሱ ዓመት የሰላም የፍቅርና የበረከት እንዲሆን መልካም ምኞታቸውን ገልጸዋል።

የኢትዮጰያ ካቶሊካዊት ቤተክርስቲያን ሊቀ ጳጳስ ብጹዕ ካርዲናል ብርሃነ ኢየሱስ ሱራፌል ምዕመናን አዲሱን ዓመት ሲቀበሉ በችግር ላይ ያሉ ወገኖቻቸውን በመደገፍ ሊሆን እንደሚገባ ጠቁመዋል፡፡

አዲሱ ዓመት የታመሙ የሚድኑበት የተጣሉ የሚታረቁበት፣ ምዕመናን ለእርቅና ለውይይት ራሳቸውን የሚያዘጋጁበት ሊሆኑ ይገባል ማለታቸውን ኢዜአ ዘግቧል፡፡

የኢትዮጵያ ወንጌላዊያን አብያተ ክርስቲያናት ሕብረት ፕሬዚዳንት ፓስተር ጻድቁ አብዱ÷ ለመላው ኢትዮጵያውያን ‘እንኳን አደረሳችሁ’ በማለት መልዕክታቸውን አስተላልፈዋል፡፡

የኢትዮጵያ ወንጌላዊት ቤተ ክርስቲያናት መካነየሱስ ፕሬዚዳንት ዮናስ ይገዙ (ዶ/ር) በበኩላቸው አዲሱ አመት የይቅርታ የአንድነትና ወደ ሰላም የመመለስ ጊዜ እንዲሆን መልካም ምኞታቸውን አስተላልፈዋል፡፡

#Ethiopia

ወቅታዊ፣ትኩስ እና የተሟሉ መረጃዎችን ለማግኘት፡-
ድረ ገጽ፦ https://www.fanabc.com/
ፌስቡክ፡- https://www.facebook.com/fanabroadcasting
ዩትዩብ፦ https://www.youtube.com/c/fanabroadcastingcorporate/
ቴሌግራም፦ https://t.me/fanatelevision
ትዊተር፦ https://twitter.com/fanatelevision በመወዳጀት ይከታተሉን፡፡
ኢንስታግራም፦ https://www.instagram.com/fana_television/
ቲክቶክ፦ https://www.tiktok.com/@fana_television

ዘወትር፦ ከእኛ ጋር ስላሉ እናመሰግናለን!

You might also like

Leave A Reply

Your email address will not be published.