Fana: At a Speed of Life!

ህብረተሰቡ ከእርድ የሚገኘውን ቆዳ በጥንቃቄ አዘጋጅቶ በወቅቱ ለገበያ እንዲያቀርብ ተጠየቀ

አዲስ አበባ፣ ጳጉሜን 6፣ 2015 (ኤፍ ቢ ሲ) ለዘመን መለወጫ በዓል ከሚፈጸም እርድ የሚገኘውን ቆዳ በጥንቃቄ በማዘጋጀት በወቅቱ ለገበያ ማቅረብ እንደሚገባ ተጠየቀ፡፡

የቆዳና ቆዳ ውጤቶች ኢንዱስትሪ ምርምርና ልማት ማዕከል ለፋና ብሮድካስቲንግ ኮርፖሬት እንደገለጸው፥ በኢትዮጵያ ከእርድ የሚገኝን ቆዳ በጥንቃቄ በማዘጋጀት በወቅቱ ለገበያ በማቅረብ ረገድ ከፍተኛ ክፍተት አለ።

ይህን ችግር በመቅረፍ ለሀገር ውስጥ አምራች ኢንዱስትሪዎች የቆዳና ሌጦ ፍላጎትን ለማሟላት በትኩረት እየተሰራ መሆኑን ገልጿል፡፡

ከዘርፉ የሚገኘውን የውጭ ምንዛሬ እና የሥራ ዕድል ለማሳደግም ከሚመለከታቸው ባለድርሻ አካላት በቅንጅት እየተሰራ መሆኑ ተጠቅሷል፡፡

ስለሆነም ማሕበረሰቡ ለአዲስ ዓመት በሚከናወን እርድ ወቅት ለቆዳ ጥራት ከፍተኛ ጥንቃቄ እንዲያደርግ ማዕከሉ አሳስቧል፡፡

በዚህ መሰረትም ቆዳ ሲገፈፍ እንዳይበሳ፣ እንዳይቆሽሽና  እንዳይበሰብስ ጥንቃቄ ማድረግ እንደሚገባ አመልክቷል፡፡

የእርድ እንስሳትን በዱላ አለመምታት፣ የእርድ ቦታን ንፁህ ማድረግ እና ቆዳ ሲገፈፍ የተፈጥሮ መስመርን ተከትሎ መሰንዘር እንደሚገባ ተጠቁሟል፡፡

ህብረተሰቡ ቆዳውን በጥንቃቄ ካዘጋጀ በኋላም በወቅቱ ወደ ገበያ በማውጣት በየአካባቢው ቆዳና ሌጦ ለሚያሰባስቡ አካላት እንዲያስረክብ ማዕከሉ አሳስቧል፡፡

 

በመላኩ ገድፍ

You might also like

Leave A Reply

Your email address will not be published.