Fana: At a Speed of Life!

ርዕሳነ መስተዳድሮች የእንኳን አደረሳችሁ መልዕክት አስተላለፉ

 

አዲስ አበባ፣ ጳጉሜን 6፣ 2015 (ኤፍ ቢ ሲ) የተለያዩ ክልሎች ርዕሳነ መስተዳድሮች ለ2016 አዲስ ዓመት የእንኳን አደረሳችሁ መልዕክት አስተላልፈዋል፡:

የሲዳማ ብሔራዊ ክልላዊ መንግሥት ርዕሰ መስተዳድር አቶ ደስታ ሌዳሞ÷ መጪው ዓመት ፀረ-ህብረብሔራዊ አንድነት ኃይሎች የዘረጉብንን ጋሬጣዎች እየበጣጠስን የኢትዮጵያን የወደፊት ብሩህ ተስፋ ከግብ ለማድረስ የምንተጋበት፤ ድህነትንና ጦርነትን ዳግም ሊግቱን የተነሱ ዘርፍ ብዙ የፅንፈኛ ሃይሎች የሴራ ፖለቲካና ፀብ ጫሪነት የሚቋጭበት ዘመን ይሆናልን ብለዋል።

እንዲሁም በቀጣይ ህብረ ብሔራዊ ኢትዮጵያን ወደ ብልፅግና ማማ ከፍ የምናደርግበት፣ የህዝቦቿን የልማት ተጠቃሚነትና ፍትሃዊነት የምናረጋግጥበት፣ ለኢትዮጵያ ብሩህ ተስፋ የሚፈነጥቅበት ዘመን መድረሱን እያሰብን የ2016 ዓ.ም ዘመን መለወጫ በዓልን በደስታ እናክብር፤ ያለን ለሌላቸው በማካፈልና በመረዳዳት፣ የተቸገሩትን በመደገፍና በመተጋገዝ በዓሉን ብናከብር ይበልጥ የደመቀ ይሆናል ሲሉ ገልፀዋል።

በተመሳሳይ የደቡብ ኢትዮጵያ ክልል ርዕሰ መስተዳድር አቶ ጥላሁን ከበደ ባስተላለፉት መልዕክት÷ አዲሱ ዓመት ለሀገራችን ሁለንተናዊ እድገት የምንተጋበት፣ የሰላም፣ የፍቅር፣ የመተሳሰብና የአንድነት ዓመት እንዲሆን እመኛለሁ ብለዋል።

አዲሱ ዓመት ለኢትዮጵያ የከፍታ ዘመን ለህዝቦቿ የአንድነትና የብልጽግና ዘመን እንዲሆንም ተመኝተው፤ አዲሱ ዓመት የክልሉ ህዝቦች በአዲስ መንፈስና በጠነከረ የስራ ባህል የሚረባረቡበትና ድህነትን የሚዋጉበት ሊሆን እንደሚገባ ርዕሰ መስተዳድሩ አስገንዝበዋል።

የጋምቤላ ክልል ርዕሰ መስተዳደር ኡሞድ ኡጁሉ ለ2016 አዲስ ዓመት ባስተላለፉት የእንኳን አደረሳችሁ መልዕክት÷ በክልሉ ሠላምን ለማረጋገጥና ልማትን ለማስቀጠል እየተከናወኑ ካሉ ሥራዎች ጎን ለጎን ለህብረተሰቡ ተጠቃሚነት ተጀምረው ሳይጠናቀቁ የቆዩ ፕሮጀክቶችን ለማጠናቀቅ ይሠራል ብለዋል፡፡

በክልሉ በፀጥታ ምክንያት የተፈናቀሉ ነዋሪዎችን በዘላቂነት ማደራጀት የክልሉ መንግስት የትኩረት አቅጣጫ መሆኑንም አረጋግጠዋል፡፡

የተገኘውን ሰላም በማጠናከር የተጀመሩ የልማትና የመልካም አስተዳደር ስራዎች እውን እንዲሆኑ ሕዝቡ ተሳትፎውን እንዲያጠናክር ጥሪ አቅርበዋል፡፡

እንዲሁም የአዲስ አበባ ከተማ ከንቲባ አዳነች አቤቤ ለ2016 አዲስ ዓመት የእንኳን አደረሳችሁ መልዕክት አስተላልፈዋል፡:

ከንቲባዋ በመልዕክታቸው÷”ለመቀበል በተዘጋጀነው 2016 ዓመት አዲስ ተስፋ የምንሰንቀበት፣ አዳዲስ ውጥኖችን ለማሳካት የምንተጋበት ፣የጎደለው ሁሉ የሚሞላበት ፣ የማይቻል የሚመስለን ሁሉ እንደ ህዳሴ ግድባችን ተችሎ ሃሴት የምናደርግበት እንዲሁም ሰላማችን ሞልቶ የሚፈስበት የለውጥና የስኬት ዓመት እንዲሆንልን እመኛለሁ” ብለዋል፡፡

እንዲሁም የሀረሪ ክልል ርዕሰ መስተዳድር አቶ ኦርዲን በድሪ በአዲሱ 2016 አመት የህዝቡን ተጠቃሚነት ለማሳደግ እየተከናወኑ የሚገኙ ስራዎች ተጠናክረው ይቀጥላሉ ሲሉ መልዕክት አስተላልፈዋል።

የክልሉን ሰላም ወደ ዘላቂ ሰላም ለማሸጋገርና በህዝቦች መካከል አብሮነት፣ መከባበርና ወንድማማችነትና እህትማማችነት የፀና አለት ላይ እንዲተከል ርብርብ ይደረጋል ብለዋል።

በክልሉ ማንኛውም አካል ከህግ በታችና በህግ ፊት እኩል መሆኑ በተግባር የማረጋገጥ ስራም በ2016 አመት ትኩረት የሚሰጠው ጉዳይ መሆኑን ጠቁመዋል።

በሌላ በኩል በክልሉ ፈጣን የኢኮኖሚ እድገትን የሚያረጋግጡ የልማት ስራዎች ትኩረት እንደሚሰጣቸውና በኢኮኖሚ እድገቱም ፍትኃዊነትን ለማረጋገጥ በቁርጠኝነት እንደሚሰራ አመላክተዋል።

 

You might also like

Leave A Reply

Your email address will not be published.