Fana: At a Speed of Life!

“የአማራ ክልል ሕዝብ የሚያነሳቸው ጥያቄዎች መፍትሄ እንዲያገኙ በቁርጠኝነት እንሠራለን”- አቶ አረጋ ከበደ

አዲስ አበባ፣ ጳጉሜን 6፣ 2015 (ኤፍ ቢ ሲ) የአማራ ክልል ሕዝብ የሚያነሳቸው ጥያቄዎች መፍትሄ እንዲያገኙ በቁርጠኝነት እንሠራለን ሲሉ የክልሉ ርዕሰ መሥተዳድር አረጋ ከበደ ገለጹ፡፡

“አዲስ ዓመት በአዲስ መንፈስ” በሚል ሀሳብ የአዲስ ዓመት በዓል አቀባበል በባሕር ዳር ከተማ እየተከበረ ነው።

በዝግጅቱ ላይ የተገኙት ርዕሰ መስተዳድር አረጋ ከበደ÷የአማራ ክልል ሕዝብ የበርካታ ባሕል እና እሴቶች ባለቤት መሆኑን አውስተዋል ።

አዲስ ዓመትን ጨምሮ የተለያዩ ሕዝባዊ እና ሃይማኖታዊ በዓላትን በጋራ የሚያከብር ሕዝብ መሆኑንም ገልጸዋል።

ክልሉ በ2015 ዓ.ም የተለያዩ ችግሮች የገጠሙት ቢሆንም የሀገር ውስጥ እና የውጭ ባለሃብቶችን በመሳብ የኢኮኖሚ ልማትን ለማጎልበት ሲሠራ ቆይቷል ብለዋል።

ያለፈው ዓመት በበርካታ ስኬቶች የታጀበ ቢሆንም ከተስፋ በተጨማሪ ስጋቶችንም አስተናግደናል ነው ያሉት ርዕሰ መስተዳድሩ።

የሕዝብን ሰላም የሚረብሹ የፀጥታ ችግሮች ተስተውለው ነበር ያሉት ርዕሰ መሥተዳድሩ÷ አሁን ላይ በክልሉ አንጻራዊ ሰላም መስፈኑን አንስተዋል።

ርዕሰ መስተዳድሩ “መጭው አዲስ ዓመት የሕዝባችንን ጥያቄ አንድ በአንድ ለይተን ለመፍታት የምንሠራበት ዓመት ይሆናል” ሲሉም ተናግረዋል።

ከክልሉ ሕዝብ እና ከሌሎች ኢትዮጵያውያን ጋር በአንድነት በመቆም በየቦታው የምናያቸው ግጭቶች ተወግደው የአማራ ሕዝብ የተሟላ ሰላም የሚረጋገጥበት ዓመት እንዲሆንም ቀን ከሌሊት እንሠራለን ብለዋል።

በአንድነት ቆመን በመደጋገፍ በመሥራት የክልሉን ሕዝብ በሚመጥነው ፖለቲካዊ፣ ምጣኔ ሃብታዊ እና ማኅበራዊ ከፍታ ላይ ለማድረስ ተግተን እንሠራለን ነው ያሉት።

የአማራ ክልል ሕዝብ የሚያነሳቸው ጥያቄዎች መፍትሄ እንዲያገኙ መሪዎች በቁርጠኝነት እንደሚሠሩም ርእሰ መስተዳድሩ አጽንኦት ሰጥተዋል።

ሕዝቡም በፍጹም ስክነት እና በሰላማዊ ሁኔታ ከአመራሩ ጎን በመቆም ለልማት እና ለአንድነቱ መንቀሳቀስ እንዳለበትም አሳስበዋል።

ሰላምን እና እርቅን የመስበክ እና የማስተማር ጥበቡ የተሰጣቸው የሀገር ሽማግሌዎች እና የሃይማኖት አባቶች ኅላፊነታቸውን በመወጣት መጪው ዘመን የመደጋገፍ እና የአንድነት እንዲሆን የድርሻቸውን እንዲወጡም ጥሪ አቅርበዋል።

You might also like

Leave A Reply

Your email address will not be published.