Fana: At a Speed of Life!

የኢትዮጵያ ኦርቶዶክስ ተዋህዶ ቤተ ክርስቲያን የረክበ ካህናት ቅዱስ ሲኖዶስ ምልዕተ ጉባኤ ተከፈተ

አዲስ አበባ፣ ግንቦት 5፣ 2012 (ኤፍ.ቢ.ሲ) የኢትዮጵያ ኦርቶዶክስ ተዋህዶ ቤተ ክርስቲያን የረክበ ካህናት ቅዱስ ሲኖዶስ ምልዕተ ጉባኤ በዛሬው ዕለት ተከፈተ።

በጉባኤው ላይ የመክፈቻ ንግግር ያደረጉት ብፁዕ ወቅዱስ አቡነ ማትያስ ቀዳማዊ ፓትርያርክ ርእሰ ሊቃነ ጳጳሳት ዘኢትዮጵያ ሊቀ ጳጳስ ዘአክሱም ወዕጨጌ ዘመንበረ ተክለ ሃይማኖት ይህ ወቅት ለሀገራችንም ለቤተ ክርስቲያናችንም ለህዝባችንም ከባድ የፈተና ወቅት ነው ብለዋል።

በዚህ ጊዜ እንደ ትናንቱ የመሰለ አካሄድና አስተሳሰብ ጭራሽ የሚያስኬድ አይሆንም ብለዋል።

ብፁዕ ወቅዱስ አቡነ ማትያስ አያይዘውም እኛ ሊቃነ ጳጳሳት እዚህ ላይ የተሰበሰብነው ህዝቡን በሁለንተናዊ ሕይወቱ ከፈተና ለመጠበቅ መሆኑን በውል የምንገነዘበው ነው ብለዋል።

ይህ ሕዝብ በአሁኑ ጊዜ በብዙ መልኩ እየተፈተነ ነው፤ ሕዝቡ በሰላም እጦት የህሊና ጭንቀት ላይ ነው ,፤ የሀገሪቱ ኢኮኖሚ በቀጣዮቹ ዓመታት በእጅጉ ሊጎዳ እንደሚችል የበሽታው ተጽዕኖ ምልክት እያሳየ ነው፤ የተከሰተው በሽታ መቼ ሊወገድ እንደሚችል የሚታወቅ ነገር የለም ነው ያሉ ብፁዕነታቸው።

ታዲያ በዚህ ሁሉ ተጎጂው ህዝባችን ነው ያሉት ፓትርያርኩ ይህ እንዳይሆን በተቻለ አቅም በጸሎትም፤ በትምህርትም፤ በምክርም፤ በማስታረቅም ሰፊ የማግባባትና የሕዝብ አድን ስራ መስራት አለብን ሲሉ ገልጸዋል።

አሁን ያለው ጥያቄ ሀገር እና ህዝብን ከፈተና የመታደግ ጥያቄ ነው፤ ይህንን ፈተና መሻጋገር የምንችለው በአንድነት ሆነን ስንቆም ነው ብለዋል።

አንድነትን ለማምጣት ደግሞ የማግባባት ስራ የግድ መሰራት አለበት ያሉት ብፁዕነታቸው በዚህ ጉዳይ ጉባኤው በጥልቀት ተወያየቶ ወደ ተጨማጭ ስራ እንደሚገባ ተናገረዋል።

ብፁዕ ወቅዱስ አቡነ ማትያስ እስካሁን ድረስ ቤተ ክርስቲያን፤ ሌሎች አብያተ ሃይማኖት ፤ መንግስትና ሕዝብ እንዲሁም የተለያዩ የመገናኛ ብዙሃን በጋራ ሆነው በሰሩት ስራ ቢያንስ ወረርሽኙ የከፋ አደጋ እንዳያደርስ በመከላከላቸው ምስጋና አቅረበዋል።

በቀጣይም በዚሁ እንዲቀጥል በጋራ እየተባበሩ መስራትን ማጠናከር አስፈላጊ ነው ብለዋል።

በዘመን በየነ

You might also like

Leave A Reply

Your email address will not be published.