Fana: At a Speed of Life!

የአስቸኳይ ጊዜ ዐዋጅ ዕዝ የማገቻ ካምፕ እንደሌለው ገለጸ

አዲስ አበባ፣ መስከረም 1፣ 2016 (ኤፍ ቢ ሲ) የአስቸኳይ ጊዜ ዐዋጅ ዕዝ የማገቻ ካምፕ እንደሌለው የአስቸኳይ ጊዜ ዐዋጅ መምሪያ ዕዝ በሰጠው መግለጫ አስታውቋል፡፡

የአስቸኳይ ጊዜ ዐዋጅ መምሪያ ዕዝ እስካሁን ያዘጋጃቸው የማቆያ ቦታዎች አምስት ብቻ መሆናቸውን ገልጿል።

እነርሱም በኮምቦልቻ፣ ጎንደር፣ ባሕርዳር፣ ሸዋ ሮቢት እና አዋሽ አርባ የሚገኙ ናቸው ያለ ሲሆን ፥ በእነዚህ ቦታዎች የሚገኙ ተጠርጣሪዎች 764 ብቻ መሆናቸውም ነው የተነገረው፡፡

ተጠርጣሪዎቹ ያሉበት ሁኔታም በአስቸኳይ ጊዜ ዐዋጅ ምርመራ ቦርድ እና በኢሰመኮ መጎብኘቱንም ዕዙ በመግለጫው ጠቅሷል፡፡

ከዚህ ውጭ የተለያዩ ፎቶዎችን እየለጠፉ ‘‘የሕጻናትና የዐዋቂዎች የማገቻ ካምፖች ናቸው’’ የሚባሉት ቦታዎች ፈጽሞ እውነት ያልሆኑ የፈጠራ ዜናዎች መሆናቸውን ነው ያነሳው።

በአስቸኳይ ጊዜ ዐዋጁ ምክንያት ሰዎችን ከዕዙ ዕውቅና ውጭ ማሠርና ማገት በሕግ የሚያስጠይቅ ወንጀል መሆኑን ያስታወቀው መግለጫው ፥ ስለዚህም በመንግሥታዊ አካል ሊፈጸም አይችልም ፤ መንግሥትም ይህ ዓይነት ፍላጎት የለውም ሲል የአስቸኳይ ጊዜ ዐዋጅ ዕዝ አስታውቋል።

በዚህ እኩይ ተግባር የተሠማሩ አካላትም ከዚህ ተግባራቸው እንዲቆጠቡ ዕዙ በጽኑ አስጠንቅቋል።

You might also like

Leave A Reply

Your email address will not be published.