Fana: At a Speed of Life!

ሀገራት በሊቢያ በጎርፍ አደጋ ለተጎዱ ዜጎች የሰብዓዊ እርዳታ እየላኩ ነው

አዲስ አበባ፣ መስከረም 2፣ 2016 (ኤፍ ቢ ሲ) የተለያዩ ሀገራት በሊቢያ በተከሰተ የጎርፍ አደጋ ጉዳት ለደረሰባቸው ዜጎች አስቸኳይ የሰብዓዊ እርዳታ መላክ ጀምረዋል፡፡

በሊቢያ ምስራቃዊ ግዛት ደርና ከተማ ሰሞኑን በተከሰተ የጎርፍ አደጋ እስካሁን ከ5 ሺህ 300 በላይ ሰዎች ለህልፈት መዳረጋቸው ተመላክቷል፡፡

በአደጋው ከሞቱት በተጨማሪ ከ10 ሺህ በላይ ሰዎች የደረሱበት አለመታወቁን ነው የሀገሪቱ ባለስልጣናት የገለጹት፡፡

አሁን ላይ በአደጋው ለህልፈት የተዳረጉ ዜጎች በጅምላ መቃብር እየተቀበሩ ሲሆን÷የማቾች ቁጥርም ሊያሻቅብ እንደሚችል ተጠቁሟል፡፡

የነፍስ አድን ሰራተኞችም በአስከፊው የጎርፍ አደጋ የጠፉ ዜጎችን በየፍርስራሹ የማፈላለግ ስራቸውን አጠናክረው መቀጠላቸው ተገልጿል፡፡

አደጋውን ተከትሎም የተለያዩ ሀገራት ከሊቢያ ሕዝብ ጎን መሆናቸውን በመግለጽ አስቸኳይ የሰብዓዊ እርዳታ እየላኩ ነው፡፡

የአሜሪካው ፕሬዚዳንት ጆ ባይደን ÷ በሊቢያ በተከሰተው የጎርፍ አደጋ ሕይወታቸውን ላጡ ዜጎች ቤተሰቦች እና ወዳጅ ዘመዶች መጽናናትን ተመኝተዋል፡፡

አሜሪካ በዚህ የችግር ሰዓት ከሊቢያ ሕዝብ ጎን ትቆማለች ያሉት ፕሬዚዳንቱ ÷ በአደጋው ለተጎዱ ዜጎች አስቸኳይ የሰብዓዊ እርዳታ መላኩን አረጋግጠዋል፡፡

የተባበሩት መንግስታት ድርጅትን ጨምሮ ሌሎች የሰብዓዊ እርዳት ድርጅቶች ለተጎጂዎች አስፈላጊውን ድጋፍ እንደሚያደርጉም ተናግረዋል፡፡

በተመሳሳይ ጀርመን፣ ቱርክ፣ ኢራን፣ ጣልያን፣ ኳታር እና ግብጽ በጎርፍ አደጋ ጉዳት ለደረሳባቸው ሊቢያውን የሰብዓዊ እርዳታ መላካቸውን ቢቢሲ ዘግቧል፡፡

You might also like

Leave A Reply

Your email address will not be published.