Fana: At a Speed of Life!

በክልሉ 78 በመቶ የሚሆኑት የሁለተኛ ደረጃ ትምህርት ቤቶች ከደረጃ በታች ናቸው ተባለ

 

አዲስ አበባ፣ መስከረም 3፣ 2016 (ኤፍ ቢ ሲ) በደቡብ ምዕራብ ኢትዮጵያ ህዝቦች ክልል 78 በመቶ የሚሆኑት የሁለተኛ ደረጃ ትምህርት ቤቶች ከደረጃ በታች መሆናቸው ተገለፀ፡፡

በክልሉ ሁሉም አካባቢዎች የትምህርት ለትውልድ ንቅናቄ መደረጉን የተገለፀ ሲሆን÷ በዚህም በህብረተሰቡ ዘንድ የባለቤትነት ስሜት መፈጠሩ ተገልጿል፡፡

በደቡብ ምዕራብ ኢትዮጵያ ህዝቦች ክልል በምክትል ርዕሰ መስተዳድር ማዕረግ የማህበራዊ ክላስተር አስተባባሪና የትምህርት ቢሮ ኃላፊ አቶ አልማው ዘውዴ እንዳሉት÷ የተማሪዎችን ውጤት ለማሻሻል የሚያግዝ የትምህርት ለትውልድ ንቅናቄ ሥራዎች ልዩ ትኩረት ተሰጥቷቸው ተፈጽመዋል።

በክልሉ ከሚገኙ ትምህርት ቤቶች ውስጥ 90 በመቶ የአንደኛ ደረጃ ትምህርት ቤቶች እና 78 በመቶ የሚሆኑት የሁለተኛ ደረጃ ትምህርት ቤቶች ከደረጃ በታች መሆናቸው፣ የመማሪያ ከፍሎች መፈራረስ፣ የመጽሐፍት ዕጥረትና ሌሎችም ችግሮች እንደነበሩ አስታውሰዋል።

ይህንን ለመቅረፍ በህዝብና መንግስት ትብብር መማሪያ ክፍሎች የማስገንባት፣ የመማሪያ መጽሐፍት የማሳተምና ሌሎች ግብአቶች የማሟላት ሥራዎች እየተሰሩ እንደሆነ ከክልሉ መንግስት ኮሙኒኬሽን ያገኘነው መረጃ ያመላክታል፡፡

በየዞኖች የተማሪዎችን ውጤት ለማሻሻልና ባለ ልዩ ተሰጥኦ ተማሪዎችን በአዳሪ ትምህርት ቤቶች ተቀብሎ ለማስተማር የሚደረገው ጥረት አበረታች መሆኑንና ተጠናክሮ መቀጠሉንም አቶ አልማው ገልጸዋል፡፡

በ2016 የትምህርት ዘመን በሁሉም ትምህርት ቤቶች 845 ሺህ ተማሪዎች ወደ ትምህርት ገበታ እንዲገቡ የማድረግ ስራ እየተሰራ ቢሆንም የእስካሁን የምዝገባ አፈፃፀም ከ50 በመቶ ያልዘለለ በመሆኑ እስከ መስከረም 13 ቀን 2016ዓ.ም ድረስ በርብርብ እንዲጠናቀቅ አሳስበዋል።

በክልሉ መስከረም 14 ቀን 2016 ዓ.ም ትምህርት እንደሚጀመርም ጠቁመዋል፡፡

You might also like

Leave A Reply

Your email address will not be published.