Fana: At a Speed of Life!

በኦሮሚያ ክልል በሥነ-ምግባር የታነጹ ዜጎችን ለማፍራት የትምህርት ሥርዓቱን የማሻሻል ስራ እየተሰራ ነው

አዲስ አበባ፣ መስከረም 3፣ 2016 (ኤፍ ቢ ሲ) በኦሮሚያ ክልል ብቁና በመልካም ሥነ-ምግባር የታነጹ ዜጎችን ለማፍራት የትምህርት ሥርዓቱን የማሻሻል ስራ እየተከናወነ መሆኑን የክልሉ ትምህርት ቢሮ አስታውቋል፡፡

በኦሮሚያ ክልል ትምህርት ቢሮ ተዘጋጅተው ወደ ሥርዓተ ትምህርቱ የተካተቱ ሁለት መማሪያ መጽሐፍቶች ተመርቀዋል።

በምረቃ መርሐ ግብሩ ላይ የክልሉ ርዕሰ መስተዳድር አቶ ሽመልስ አብዲሳ፣ የሃይማኖት አባቶች፣ አባገዳዎች፣ ሀደሲንቄዎ፣ የትምህርት ዘርፉ ሃላፊዎችና ባለሙያዎች ተገኝተዋል።

መጽሐፍቶቹም ‘ኪድ-ኢንተርፕረነርሺፕ’ የተሰኘ ከቅድመ መደበኛ ትምህርት ቤት ጀምሮ ህጻናትን በክህሎት ለማነጽ የተዘጋጀ መጽሐፍና ‘በርኖታ ሰፉ’ የተሰኘ ከ1ኛ ክፍል እስከ 6ኛ ክፍል የሚሰጥ የግብረ ገብ ትምህርት ነው።

በምክልት ርዕሰ መስተዳድር ማዕረግ የክልሉ ማህበራዊ ክላስተር አስተባባሪ አቶ አብዱልሀኪም ሙሉ÷ በክልሉ በትምህርት ዘርፍ ውጤታማ ስራዎች እየተከናወኑ ነው ብለዋል።

በተለይም በክልሉ የሚተገበረው የትምህርት ስርዓት ብቁ፣ ሁለገብና በመልካም ስነ-ምግባር የታነጹ ዜጎችን ለማፍራት እንዲያግዝ ስርዓተ ትምህርቱን የማሻሻል ስራ እየተሰራ መሆኑን ገልጸዋል።

ባለፉት ዓመታት የተተገበረው የትምህርት ስርዓት ብዙ ጉድለቶች እንዳሉበት ጠቁመው፥ በተለይም ከሥነ-ምግባር አንጻር ትውልዱ ብዙ አሉታዊ ነገሮች ውስጥ እየገባ መሆኑን ጠቅሰዋል።

ለመፍትሄው ይረዳ ዘንድ ህጻናት ክህሎታቸውን የሚለዩበትና የፈጠራ አቅማቸውን የሚያሳድጉበት እንዲሁም መልካም ሥነ-ምግባር የተላበሱ እንዲሆኑ ሁለቱ መጽሐፍቶች ወደ ስርዓተ-ትምህርት እንዲካተቱ መደረጉን አስታውቀዋል።

የክልሉ ትምህርት ቢሮ ኃላፊ ቶላ በሪሶ (ዶ/ር) በበኩላቸው፥ የነበሩ ጉድለቶችን ለማቃለል የክልሉ ትምህርት ቢሮ ሥርዓት ትምህርትና የትምህርት መሰረተ ልማት ላይ የተለያዩ ስራዎችን እያከናወነ መሆኑን አንስተዋል።

ከዚህ ውስጥ የቅድመ መደበኛ ትምህርት ቤቶችን ማስፋፋት፣ ልዩ አዳሪ ትምህርት ቤቶችን መገንባትና 2ኛ ደረጃ ት/ቤቶችን የማስፋፋት ስራ በስፋት ተከናውኗል ማለታቸውን ኢዜአ ዘግቧል።

You might also like

Leave A Reply

Your email address will not be published.