Fana: At a Speed of Life!

አምባሳደር ምስጋኑ ከካናዳ የኢሚግሬሽን፣ የስደተኞችና የዜግነት ምክትል ሚኒስትር ጋር ተወያዩ

አዲስ አበባ፣ መስከረም 5፣ 2016 (ኤፍ ቢ ሲ) የውጭ ጉዳይ ሚኒስትር ዴኤታ አምባሳደር ምስጋኑ አርጋ ከካናዳ የኢሚግሬሽን፣ የስደተኞች እና የዜግነት ምክትል ሚኒስትር ስኮት ሀሪስ ጋር ተወያይተዋል።

ውይይታቸውም በሁለቱም ሀገራት የኢሚግሬሽን፣ የስደተኞች እና የዜግነት አገልግሎት ተቋማት መካከል ያለውን ትብብር ማጠናከር የሚቻልበት ሁኔታ ላይ ያተኮረ ነበር።

በተለይም የኢትዮጵያን አቻ ተቋም አቅም ለማሳደግ የልምድ ልውውጥ ማድረግ በሚቻልበት ጉዳይ ላይ መክረዋል።

የሀገራቱን ትብብርና የሁለትዮሽ ግንኙነት ማጠናከር የሚያስችሉ ጉዳዮች ላይ በማተኮር የኢኮኖሚ እድገትን ማምጣትና ለዜጎች የስራ እድል መፍጠር ላይ አወንታዊ እርምጃዎችን መውሰድ በሚቻልባቸው አጀንዳዎች ላይ መክረዋል።

በዚህም ኢትዮጵያውያን በካናዳ ጊዜያዊ የስራ ቅጥር እድሎችን እንዲያገኙ፤ ከካናዳ የስራ ገበያ ፍላጎቶችና መስፈርቶች ጋር የሚጣጣሙ ኢትዮጵያውያን ሰራተኞችን ሊጠቅሙ የሚችሉ የስራ እድሎችን ማመቻቸት ላይም ተወያይተዋል።

በካናዳ መማር ለሚፈልጉ ኢትዮጵያውያን ተማሪዎች የትምህርት ዕድሎችን ማስፋት ላይ የመከሩ ሲሆን ይህም በሀገራቱ መካከል ያለውን የትምህርትና የባህል ትስስር የበለጠ ለማጠናከር ያለመ መሆኑን ኢዜአ ዘግቧል።

የህዝብ ለህዝብ ግንኙነቱን ለማጠናከርም የቪዛ አሰራሮችን ቀላል በማድረግ በኢትዮጵያና በካናዳ መካከል ያለውን የንግድ፣ የኢንቨስትመንት እና የቱሪዝም ግንኙነት የበለጠ ማሳደግ በሚቻልበት ሁኔታ መነጋገራቸውም ተገልጿል።

በአጠቃላይ የጋራ ጉዳዮች ውጤታማ እንዲሆኑ በጋራ ጠንክረው እንደሚሰሩ መግባባት ላይ መድረሳቸው ተገልጿል።

ይህ የትብብር ጥረት በኢትዮጵያና በካናዳ መካከል ያለውን የሁለትዮሽ ግንኙነት ለማጠናከር፣ የኢኮኖሚ እድገትን ለማምጣት አወንታዊ ሚና ይኖረዋል ተብሏል።

You might also like

Leave A Reply

Your email address will not be published.