Fana: At a Speed of Life!

የፌደራል ጠቅላይ አቃቤ ህግና የተጠሪ ተቋማት ሰራተኞች ከደሞዛቸው በማዋጣት ለኮቭድ-19 መከላከል ስራ 3 ሚሊየን ብር ለገሱ

አዲስ አበባ፣ ግንቦት 6፣ 2012 (ኤፍ.ቢ.ሲ) የፌደራል ጠቅላይ አቃቤ ህግና የተጠሪ ተቋማት ሰራተኞች ከወር ደሞዛቸው በማዋጣት ለኮቭድ-19 መከላከል ስራ የ3 ሚሊየን ብር ድጋፍ አደረጉ።

በተጨማሪም ካሁን በፊት በእርዳታ የተሰጠውን 21 ሺህ የአፍና አፍንጫ መሸፈኛ ጭምብል፣ 160 የኬሚካል ምርጫ መሳሪያ እና 10 የሙቀት መለኪያ ቴርሞ ሜትር ድጋፍ አድርጓል።

የአፍና አፍንጫ መሸፈኛ እና ኬሚካል መርጫዎቹ ለፌደራል ፖሊስ፣ ለአዲስ አበባ ፖሊስ እና ለፌደራል ማረሚየ ቤቶች አስተዳደር የሚሰጡ ናቸው ተብሏል።

እንዲሁም 3 ሚሊየን ብሩ ደግሞ የኮሮናቫይረስ ወረርሽኝን ለመከላከል ለተቋቋመው ለብሔራዊ ድጋፍ አሰባሰብ ኮሚቴ የሚሰጥ መሆኑም ነው የተገለፀው።

የፌደራል ጠቅላይ አቃቤ ህግ ወይዘሮ አዳነች አቤቤም “ይህንን በመሰሉ የዜጎች መልካም ተግባርና የጋራ ርብርብ ወረርሽኙን ከሀገራችን በማጥፋት ታሪክ እንደምንሰራ አልጠራጠረም” ብለዋል በድጋፍ መስጠት ስነ ስርዓቱ ላይ።

ድጋፉ ተልዕኳቸው የተሳካ እንዲሆን፣ እንዲያግዝና የቫይረሱን ስርጭት መቀነና መከላከል ላይ የጸጥታ ሃይሉ አረአያ እንዲሆን ለማድረግም ጭምር እንደሆነ ነው የጠቆሙት።

የጸጥታ አካላት የቫይረሱን ስርጭትና የአስቸኳይ ግዜ አዋጁን ለማስፈጸም የሚያደርጉትን ርብርብ ስኬታማ እንዲሆን ህብረተሰቡ ለደንብና ለመመሪያ ተገዥ ሆኖ ሊያዛቸው ይገባልም ብለዋል።

የብሔራዊ የድጋፍ አሰባሰብ ኮሚቴ የሃብት አሰባሰብ ንዑስ ኮሚቴ ሰብሳቢ አምባሳደር ምስጋኑ አረጋ ኮሮናቫይረስን ለመከላከልና ለመቆጣጠር በሚደረገው ርብርብ በርካታ ተቋማት፣ ባለኃብቶችና ግለሰቦች ድጋፍ እያደረጉ መሆኑን በማንሳት በተለይም ቫይረሱን ለመከላከል ግንባር ቀደም ሆነው ህዝብን ለሚያገለግሉ የጸጥታ አካላት መሆኑ የዛሬው ድጋፍ ለየት ያደርገዋል ብለዋል።

በለይኩን ዓለም

You might also like

Leave A Reply

Your email address will not be published.