የአርቲስት ሃጫሉ ሁንዴሳን ግድያ ተከትሎ በተፈጸሙ ወንጀሎች ዙሪያ በኦሮሚያ ክልል ሲካሄድ የነበረው ምርመራ መጠናቀቁ ተገለፀ

የፌደራል ጠቅላይ አቃቤ ህግ እና ኦሮሚያ ጠቅላይ አቃቤ ህግ ጉዳዩን አስመልክተው በጋራ መግለጫ ሰጥተዋል።

በመግለጫው ምክትል አቃቤ ህጉ አቶ ፍቃዱ ጸጋ ባለፉት ወራት በኦሮሚያ ክልል በተካሄደው የምርመራ ሂደት ውስጥ የፌደራል ጠቅላይ አቃቤ ህግ፣ ከፌደራል ፖሊስ፣ከኦሮሚያ ጠቅላይ አቃቤ ህግ እና የኦሮሚያ ፖሊስ ጋር በጋራ ሲሰራ መቆየቱን አስታውቀዋል።

በዚህም በ488 የክስ መዝገብ 5 ሺህ 728 ግለሰቦች ላይ ክስ ተመስርቶባችዋል ነው ያሉት።

በዚህም 3 ሺህ 377 ተከሳሾች በፌደራል መንግስት ስልጣን ስር የሚወድቅ ወንጀል በመፈጸማቸው ተጠያቂነታቸው በፌደራል ጠቅላይ አቃቤ ህግ ሲሆን፤2 ሺህ 351 ተከሳሾች ደግሞ በኦሮሚያ ጠቅላይ አቃቤ ህግ ስር ይሆናል ተብሏል።

ከተጠርጣሪዎች ብዛት፣ ከወንጀሉ ስፋት እና ወንጀሉ ከተፈጸመበት ቦታ ስፋት አኳያ ምርመራው ጊዜ እንደወሰደ ነው የፌደራል ምክትል ጠቅላይ አቃቤ ህጉ አቶ ፍቃዱ ጸጋ የተናገሩት።

በፌደራል ጠቅላይ አቃቤ ህግ ተከሳሾች በ114 የክስ መዛግብት ክሳቸው መደራጀቱም ነው የተገለፀው፡፡

በኦሮሚያ ጠቅላይ አቃቤ ህግ ደግሞ በ374 የክስ መዛግብት ክሳቸው ተደራጅቷል።

ከእነዚህ ውስጥ 63 ግለሰቦች በሀረር በፈረሱ ሃውልቶች ምክንያት በሽብር ህጉ መሰረት ተጠያቂ የሚሆኑ ናቸው ተብሏል።

የፌደራል ምክትል ጠቅላይ አቃቤ ህጉ አቶ ፍቃዱ ጸጋ እና የኦሮሚያ ጠቅላይ አቃቤ ህጉ አቶ ሁሴን ኡስማን በጋራ መግለጫቸው ፍርድ ቤቶች የፍርድ ሂደቱን ለማየት በሚያስችል መንገድ ዝግጅታቸውን ማጠናቀቃቸውን እና የህግ የበላይነትን የማስከበሩ ተግባር ተጠናክሮ እንደሚቀጥል አስታውቀዋል።

በምስክር ስናፍቅ