ቀጠናውን ወደነበረበት ለመመለስ የተቋቋመው የአጎራባች ክልሎች ግብረ ሃይል ያከናወናቸውን ስራዎች ገመገመ

በዞኑ ውስጥ በህብረተሰቡ በኩል የሚነሱ የመሰረተ ልማት አለመሟላት የሀገር መከላከያ ሰራዊት ቀጠናውን ከታጠቁ ሃይሎች ነጻ ለማድረግ ፈታኝ ሁኔታዎች እንደፈጠረበት የመተከል ዞን ኮማንድ ፖስት ሰብሳቢ ኮለኔል ወርቅነህ ጉደታ አውስተዋል።

በቀጠናው ሰላምን ለማስፈን ከፌደራልና ከሶስቱ ክልሎች ከተውጣጡ ቡድኖች በኩል የተነሳውን የመፍትሄ ሃሳብ መውሰድ እንደሚገባም ገልጸዋል።

ለውጡን በተፈለገው ፍጥነት ወደ ህዝቡ በማውረድ እና ለማስተማር የሚደረገው የአመራር ምደባ ጉዳይ በትኩረት ሊታይ እንደሚገባውም ግብረ ሃይሉ ገልጿል።

የክልሉ ምክትል ርዕሰ መስተዳድር አቶ ጌታሁን አብዲሳ በበኩላቸው በየደረጃው የሚነሱ ሁሉን ዓቀፍ ጥያቄዎችን በአጭር እና በረጅም ጊዜ የሚፈቱ ችግሮችን በመለየት እና ምላሽ ለመስጠት የክልሉ መንግስት እየሰራ መሆኑን ተናግረዋል።

በመድረኩ በአማራ እና በቤኒሻንጉል ጉሙዝ ክልሎች ከፍተኛ አመራሮች በኩል ህዝቡን ብዥታ ውስጥ የሚከትና አመኔታን የሚያሳጣ መግለጫዎ ከመስጠት መቆጠብ እንዳለባቸው ተገልጿል።

በሌላ በኩል በአሁኑ ወቅት በሀገር መከላከያ ሰራዊት እና በፌደራል ፖሊስ እንዲሁም በየደረጃ ባለው የጸጥታ መዋቅር አማካኝነት አካባቢው ወደ ነበረበት ሰላም እየተመለሰ መሆኑን ከመተከል ዞን ኮሙዩኒኬሽን ያገኘነው መረጃ ያመላክታል።