Fana: At a Speed of Life!

አብንና ኢዜማ ሕወሓት በትግራይ ክልል በሚገኘው የመከላለከያ ሠራዊት ላይ የከፈተውን ጥቃት እንደሚያወግዙ አስታወቁ

አዲስ አበባ ፣ ጥቅምት 25 ፣ 2013 (ኤፍ ቢ ሲ) የአማራ ብሔራዊ ንቅናቄ (አብን) እና የኢትዮጵያ ዜጎች ለማኅበራዊ ፍትህ(ኢዜማ) ሕወሓት በትግራይ ክልል በሚገኘው የኢፌዴሪ መከላለከያ ሠራዊት ላይ የከፈተውን ጥቃት እንደሚያወግዙ አስታወቁ፡፡
ፓርቲዎቹ ዛሬ ባወጡት መግለጫ እንዳስታወቁት መንግሥት በሕወሓት ላይ የሚወስደውን ሕግ የማስከበር ሥራ ይደግፋሉ፡፡
ሕወሓት በትግራይ ክልል በሚገኘው የአገር መከላከያ ካምፕ ላይ እና በአማራ ክልል ዳንሻ እና ሶሮቃ በኩል ጥቃት ማድረሱን ተከትሎ መንግሥት እየወሰደ ያለው የሕግ ማስከበር ሥራ ፍፃሜ እንዲያገኝ ሕዝብን ማስተባበር ያስፈልጋል ብሏል።
ሕዝቡ በመንግሥት የሚሰጡ የጥንቃቄ መልዕክቶችን በመቀበል ራሳቸውን እና አካባቢያቸውን እንዲጠብቁ አብን አሳስቧል።
በሌላ በኩል ሕወሓት በተለያዩ ጊዜያት ሲያስተላልፋቸው የነበሩ የሥርዓት አልበኝነት ጥሪዎች እና በክልሉ ሕግን ተላልፎ ሲፈጽም የነበራቸው ድርጊቶች አልበቃ ብለውት የኢትዮጵያ ሉዓላዊነት ምልክት በሆነው መከላከያ ሠራዊት ላይ የፈፀመው ጥቃት በፍፁም በዝምታ የሚታለፍ እንዳልሆነ እናምናለን ብሏል ኢዜማ በመግለጫው።
የነበረው ችግር በንግግር መፈታት ከሚችልበት ምዕራፍ አልፎ አሁን የደረሰበት ደረጃ መድረሱ በጣም አሳዝኖናልም ብሏል።
ፓርቲዎቹ በሚወሰዱ እርምጃዎች ሰላማዊ ዜጎች ምንም ዓይነት ጉዳት እንዳይደርስባቸው አስፈላጊው ጥንቃቄ መደረግ እንደሚገባውም አስታውሰዋል።
You might also like

Leave A Reply

Your email address will not be published.