ግድቡ የብርቱ ህዝቦች የአንድነታችን ፣የአብሮነታችን ማሳያ የብልጽናችን መሰረት በመሆኑ እንደ ህወሓት አይነት ባንዳዎች ከፍጻሜው ለአፍታም አያስቆሙንም- ወ/ሮ አዳነች አቤቤ

ምክትል ከንቲባ ወይዘሮ አዳነች አቤቤ የታላቁ ህዳሴ ግድብ ዋንጫን ከአዲስ ከተማ ክፍለ ከተማ ለየካ ክፍለ ከተማ አስረክበዋል ።

በዋንጫ ርክክቡ ወቅት ምክትል ከንቲባዋ እንደገለፁት ÷እስካሁን በተለያዩ ክፍለ ከተሞች ለታላቁ የኢትዮጵያ ህዳሴ ግድብ እየተደረጉ ያሉ ድጋፎች ከታቀደው በላይ መሆኑን ገልጸዋል ።

ታላቁ የኢትዮጵያ ህዳሴ ግድብ የብርቱ ህዝቦች የአንድነታችን ፣የአብሮነታችን ማሳያ እና የብልጽናችን መሠረት በመሆኑ እንደ ህወሓት አይነት ባንዳዎች ከግድቡ ፍጻሜ ለአፍታም አያስቆሙንም ሲሉ ተናግረዋል ።

የአዲስ ከተማ ክፍለ ከተማ ዋና ስራ አስፈጻሚ አቶ ይታያል ደጀኔ በበኩላቸው ÷በሁለት ሳምንት ጊዜ ውስጥ ለግድቡ ግንባታ ከ313 ሚሊየን ብር በላይ በቦንድ ግዥና በስጦታ መሰብሰቡን ገልጸዋል ።

ዋንጫው በክፍለ ከተማው ቆይታ በሚያደርግበት ቀናት በመከላከያ ሰራዊቱ ላይ የደረሰው ክህደት አስደንጋጭ ቢሆንም ህብረተሰቡ ለበለጠ እልህና ቁጭት በመነሳሳት ለሃገር አለኝታነቱን አረጋግጧል ብለዋል ።

በተጨማሪም ስለህዳሴ ግድብ ፍትሀዊ ተጠቃሚነት በተለያዩ አለምአቀፍ ሚዲያዎች ድምጹን ሲያሰማ ለነበረው መሀመድ አል-አሩሲ የእውቅና ሽልማት ከምክትል ከንቲባ ወይሮ አዳነች አቤቤ እንደተበረከተላቸው ከአዲስ አበባ ከተማ ፕሬስ ሴክሬቴሪያት ያገኘነው መረጃ ያመላክታል፡፡