Fana: At a Speed of Life!

80 በመቶ የጣና ሐይቅ የእምቦጭ አረም ተነቅሏል

አዲስ አበባ፣ ህዳር 9፣ 2013 (ኤፍ.ቢ.ሲ) ለአንድ ወር በተካሄደው የእንቦጭ አረም የማስወገድ ዘመቻ 80 በመቶን አረም መነቀሉ ተገለጸ፡፡

የጣና ሐይቅና ሌሎች ውሃማ አካላት ጥበቃና ልማት ኤጄንሲ ሥራ አስኪያጅ ዶክተር አያሌው ወንዴ ለአንድ ወር በቆየው ዘመቻ ከ4 ሺህ 300 ሄክታር መሬት ውስጥ 80 በመቶው የሚሆነው አረም እንደተወገደ ተናግረዋል፡፡

ከሃይቁ የተነቀለውንና የተከማቸውን የእንቦጭ አረም መነስነስ፣ መልቀምና ማቃጠል ቀሪ ስራ መሆኑንም ነው የተናገሩት፡፡

የዘመቻው የመዝጊያ ሥነ ስርዓት ሕዳር 20 ቀን እንደሚደረግ ጠቅሰው በመጭዎቹ ሳምንታት አረሙን የማስወገዱ ስራ ይቀጥላልም ብለዋል፡፡

እስካሁን 260 ሺህ ዜጎች በዘመቻው ሲሳተፉ በቀን ከ2 ሺህ እስከ 14 ሺህ ዘማቾች መሳተፋቸውም ነው የተገለጸው፡፡

አረሙ ላለፉት ዓመታት በሐይቁ ላይ ዘሩን ስለጣለ ክትትል እንደሚያስፈልገው በመጥቀስም አካባቢውን በነባር ዕፅዋት መተካትና ልቅ ግጦሽን መከላከል እንደሚያስፈልግም አስረድተዋል፡፡

ለዘመቻው የገንዝብ ድጋፍ የሚያደርጉና ገንዘቡን ያልከፈሉ የክልልና የፌደራል ተቋማት ገንዘቡን እንዲከፍሉ መጠየቃቸውን አብመድ ዘግቧል፡፡

You might also like

Leave A Reply

Your email address will not be published.