ጤና ሚኒስቴር ከሁለት ተቋማት ጋር የአስቸኳይ ሕክምና መመሪያ በጋራ ለመተግበር ተስማማ

አዲስ አበባ፣ ታህሳስ 6፣ 2013 (ኤፍ.ቢ.ሲ) ጤና ሚኒስቴር፣ የፌደራል ፖሊስና የመድን ፈንድ አስተዳደር ኤጀንሲ የአስቸኳይ ሕክምና መመሪያ ለመተግበር ስምምነት ተፈራረሙ።

ስምምነቱን የጤና ሚኒስትር ዲኤታ ወይዘሮ ሰሃረላ አብዱላሂ፣ የፌደራል ፖሊስ ምክትል ኮሚሽነር መላኩ ፋንታ እና የመድን ፈንድ አስተዳደር ኤጀንሲ ዳይሬክተር ወይዘሮ ወርቅነሽ ብሩ ናቸው የተፈራረሙት።

በስምምነቱ መሰረት የተሽከርካሪ አደጋ የሚደርስባቸው ዜጎች አስቸኳይ ሕክምና የሚያገኙበት ስርዓት ይዘረጋል ተብሏል።

አደጋው የደረሰባቸው ዜጎች እስከ ሁለት ሺህ ብር የሚያስወጣ ሕክምና በነጻ ማግኘት እንደሚችሉ በመመሪያው ተቀምጧል።

የጤና ተቋማት መመሪያውን ስለመተግበራቸው ክትትል እንደሚደረግ በስምምነቱ ላይ ተካቷል።

መድን ፈንድ አስተዳደር ኤጀንሲ ደግሞ ነጻ ሕክምናው ስለመኖሩ ግንዛቤ የሚፈጥሩ ስራዎችን ያከናውናል ነው የተባለው።

የአስቸኳይ ሕክምና አገልግሎቱ ተግባራዊ እንዲሆን ተቋማቱ በቅንጅት የሚሰሩ ሲሆን የክልል ባለድርሻ አካላትም በጉዳዩ ላይ በጋራ እንደሚሰሩ ኢዜአ ዘግቧል።