Fana: At a Speed of Life!

በማይካድራ ንጹሃን ዜጎችን ሲያስጨፈጭፉ ነበሩ የተባሉ ሁለት ተጠርጣሪዎች ፍርድ ቤት ቀረቡ

አዲስ አበባ፣ ታህሳስ 20፣ 2013(ኤፍ ቢ ሲ) በማይካድራ ንጹሃን ዜጎችን ሲያስጨፈጭፉ ነበሩ የተባሉ ሁለት ተጠርጣሪዎች ሸሽተው አዲስ አባባ በመግባት ከተደበቁበት የእንግዳ ማረፊያ (ገስት ሃውስ) ትናንት ተይዘው ፍርድ ቤት ቀረቡ።
ተጠርጣሪዎቹን አዲስ አበባ በመቀበል ደብቀዋቸዋል የተባሉ ሶስት ግለሰቦችም ፍርድ ቤት ቀርበው ጉዳያቸው ታይቷል።
በማይካድራ ንጹሃን ዜጎችን እንዲጨፈጨፉ በማድረግ በጎንደር አድርገው አዲስ አበባ ገብተው በእንግዳ ማረፊያ ውስጥ በቁጥጥር ስር የዋሉት 1ኛ ተጠርጣሪ በጋምቤላ በማምረቻ ዘርፍ ላይ በግል ድርጅቱ ይሰራ የነበረ ተስፋዬ ከበደ የሚባል ሲሆን 2ኛ ተጠርጣሪ ደግሞ ወይዘሮ አባዲት አብርሃ ይባላሉ።
እነዚህ ተጠርጣሪዎችን አዲስ አበባ ተቀብለው ደብቀዋል ተብለው ፍርድ ቤት የቀረቡት ደግሞ ኪዳኔ ገብረህይወት ፣ ሙሉ አለም ዩሃንስ እና ፍሬሰንበት ለማ መሆናቸው ተገልጿል።
የፌደራል ፖሊስ ኮሚሽንም ተጠርጣሪዎቹን ፍርድቤት አቅርቦ ለተጨማሪ ምርመራ 14 ቀናት ጠይቋል።
1ኛ ተጠርጣሪም እኔ በጋምቤላ በግል ድርጅቴ በማምረቻ ዘርፍ ተሰማርቼ ነው የምሰራው ወደ ጋምቤላ ልሄድ ስል ነው የተያዘኩት ከ2ኛ ተጠርጣሪ ጋርም አንተዋወቅም ብለዋል።
በተመሳሳይም ሁለተኛ ተጠርጣሪ ከሁመራ በጎንደር አዲስ አበባ በመግባት ወደትግራይ ልሄድ ስል ነው የተያዝኩት ከ1ኛ ተጠርጣሪ ጋር አንተዋወቅም ሲሉ በዋስትና እንዲወጡ ጠይቀዋል።
3ኛ ተጠርጣሪ በበኩላቸው ከ1ኛ ተጠርጣሪ ጋር ትውውቅ አለን የአልጋ ከፍዬለታለሁ እንጂ ምንም አላጠፋሁም ያሉ ሲሆን ÷ 4ኛ ተጠርጣሪም ከ1ኛ ተጠርጣሪ ጋር እንደሚተዋወቁና አዲስ አበባ መምጣቱን ስሰማ ምሳ ልጋብዘው አብረን ሄደን ነው የተያዘኩት ብለዋል።
5ኛ ተጠርጣሪ በበኩላቸው÷ እኔ የእንግዳ ማረፊያ (የገስት ሀውስ) አከራይና ተማሪ ነኝ 1ኛ እና 2ኛ ተጠርጣሪዎች ማረፊያ እንፈልጋለን ሲሉኝ አስገብቼ አሳየኋቸው ሌላ ወንጀል የለብኝም ሲል ተከራክሯል።
መርማሪ ፖሊስም 1ኛ እና 2ኛ ተጠርጣሪዎች ንጹሃንን አስጨፍጭፈው ወደ አዲስ አበባ በመሸሽ በእንግዳ ማረፊያ በመደበቅ ከ3 እስከ 5ኛ ያሉ ተጠርጣሪዎችም እነዚህን ተጠርጣሪዎች በመደበቅ በተባባሪነት ወንጀል ነው የተጠረጠሩት ሲል ለችሎቱ አስረድቷል።
የሁለቱን ክርክር ያዳመጠው የፌደራል የመጀመሪያ ደረጃ ፍርድ ቤትም 1ኛ የጊዜ ቀጠሮ ችሎት ለመርማሪ ፖሊስ 14 የምርመራ ጊዜን ፈቅዷል።
ከፌስቡክ ገፃችን በተጨማሪ ወቅታዊ፣ ትኩስ እና የተሟሉ መረጃዎችን ለማግኘት፡-
የፋና ድረ ገጽ https://www.fanabc.com/ ይጎብኙ፤
ተንቀሳቃሽ ምስሎችን ለማግኘት የፋና ቴሌቪዥን የዩቲዩብ ቻናል www.youtube.com/fanatelevision ሰብስክራይብ ያድርጉ
ፈጣን መረጃዎችን ለማግኘት ትክክለኛውን የፋና ቴሌግራም ቻናል https://t.me/fanatelevision ይቀላቀሉ
ከዚህ በተጨማሪም በትዊተር ገጻችን https://twitter.com/fanatelevision ይወዳጁን
ዘወትር ከእኛ ጋር ስላሉ እናመሰግናለን!
You might also like

Leave A Reply

Your email address will not be published.