በመተከል ዞን አዲስ የሚመረጡ የስራ ኃላፊዎች ሕዝብ መምራት የሚችሉት በሕዝብ ተቀባይነት ያገኙ ብቻ መሆናቸው ተገለፀ

የጸጥታና የሕግ ማስከበር ስራውን በአንድ ወር ጊዜ አጠናቆ ለአስተዳደሩ ለማስረከብ ዕቅድ ነድፎ እየተንቀሳቀሰ ያለው ግብረ ሃይሉ የሁለት ሣምንት ስራውን እየገመገመ ነው።

ግብረ ኃይሉ የመተከልን ዞን የጸጥታና የሕግ ማስከበር ስራ ከተረከበ በኋላ በተለያዩ ወረዳዎችና ቀበሌዎች ከሕዝብ ተወካዮች፣ ከሀገር ሽማግሌዎች፣ ከምሁራንና ከወጣቶች ጋር ምክክር አድርጓል።

ጎን ለጎንም በሽፍታው ቡድን ላይ ሕግ የማስከበር እርምጃ በመውሰድ ተቆጣጥሯቸው የነበሩ ቦታዎችን ማስለቀቅ ተችሏል።

የሀገር መከላከያ ሠራዊት በሁሉም አካባቢዎች ተሰማርቶ ሕግ የማስከበር ዘመቻ በማከናወኑ በዞኑ አንፃራዊ ሠላም ሰፍኗል፤ የዜጎች የጸጥታ ስጋትም ቀንሷል ተብሏል።

በማወቅም ይሁን ባለማወቅ በተሳሳተ መረጃ ወደ ጫካ የገቡ ዜጎች ወደ ቀያቸው እንዲመለሱ እየተደረገ ስለመሆኑም ተገልጿል።

የጥፋት ቡድኑ በንጹሃን ዜጎች ላይ የፈጸመው ማንነትን መሰረት ያደረገ ጥቃትና የንብረት ውድመት የማንንም ብሄር የማይወክል መሆኑን ኅብረተሰቡ በተለያዩ መድረኮች ስለማረጋገጡም ተጠቁሟል።

ከጥፋት ቡድኑ ውድመት የተረፈው የአርሶ አደሮች ሰብልም ከመከላከያ ሠራዊትና ከጸጥታ ኃይሉ ጋር በመቀናጀት እየተሰበሰበ ነው ተብሏል።

የጉሙዝ ሕዝቦች ዴሞክራሲያዊ ንቅናቄ፣ ኦነግ ሸኔ እና ሌሎችም የአማፂው የህወሓት ቡድን አባላት ሙሉ በሙሉ ካልተደመሰሱ በአካባቢው ዘላቂ ሠላም ለማስፈን አስቸጋሪ እንደሚሆንም መነሳቱን ኢዜአ ዘግቧል።

በመተከል ኃላፊነታቸውን ያልተወጡ የወረዳና ቀበሌ የስራ ሃላፊዎች እንዲነሱ፤ ወንጀል ያለባቸውም በሕግ እንዲጠየቁ እየተደረገ ነውም ተብሏል።

በተጨማሪም አዲስ የሚመረጡ የስራ ኃላፊዎች ሕዝብ መምራት የሚችሉት በሕዝብ ፊት ቀርበው ተቀባይነት ሲያገኙ ብቻ በመሆኑ ይህም እየተደረገ መሆኑም ነው የተገለጸው።

ትምህርት ቤቶችን የመማር ማስተማር ማስጀመር፣ የጤና ተቋማትን ሙሉ በሙሉ ለአገልግሎት ክፍት ማድረግና ተፈናቃዮችን ወደ ቀያቸው መመለስ የቀጣዮቹ ሁለት ሣምንታት ስራ እንደሚሆንም ተገልጿል።