Fana: At a Speed of Life!

እያንዳንዳቸው1ነጥብ8 ሚሊየን ብር ዋጋ ያላቸው 80 ታወሮች ተዘርፈዋል – በኢትዮጲያ ኤሌክትሪክ ሀይል ደቡብ ሪጅን

አዲስ አበባ፣ ሃምሌ 29፣ 2013(ኤፍ ቢ ሲ)እያንዳንዳቸው1ነጥብ8 ሚሊየን ብር ዋጋ ያላቸው 80 ታወሮች እንደተዘረፉበት በኢትዮጲያ ኤሌክትሪክ ሀይል ደቡብ ሪጅን አስታወቀ።

በዚህም በምዕራብ አርሲ ዞን ተደጋጋሚ የመብራት ሀይል መቆራረጥ እንዲገጥመው እንዳደረገ ሪጅኑ ገልጿል።

እንደ ሪጅኑ ገለፃ÷ ከፍተኛ ዝርፊያ የሚፈፀምባቸው የዞኑ የሻሸመኔና ወንዶ ወረዳዎች በ2013 በጀት አመት በስርቆት ምክንያት ስምንት ታወሮች ወድቀዋል።

ይህም ዞኑ ከገናሌ ዳዋ የሚመጣውን ሀይል እንዳያገኝ እንከን እንደሆነበት የሪጅኑ የሀይል ስርጭት ማዕከላት ኦፕሬሽንና ጥገና ዳይሬክተር አቶ አለማየሁ ዘበርጋ ለፋና ብሮድካስቲንግ ኮርፖሬት ገልፀዋል።

ከፍተኛ የኤሌክትሪክ ተሸካሚ ብረቶቹ በውጭ ሀገር ገበያ የአንዱ ዋጋ 1ነጥብ8 ሚሊየን ብር እንደሚገዛ የገለጹት አቶ አለማየሁ ÷ ህብረተሰቡ በሀይል እጦት እንዳይቸገር የተዘረፉ ታወሮችን በእንጨት የመተካት ስራ እየተሰራ ቆይቷል ብለዋል።

በዚህም በየዓመቱ ከ3ነጥብ1 ሚሊየን ብር በላይ ድርጅቱ ወጪ እኖዲያደርግ አስገድዶታል።

የደቡብ ሪጅን ኤሌክትሪክ ሀይል ስርጭት ጥገና ሀላፊ አቶ ሞሲሳ ገልቻ በበኩላቸው÷ ከሀላባ ሻሸመኔ ካሉ 230 ታወሮች ውስጥ 80 ያህሉ ዝርፊያ ተፈፅሞባቸዋል ብለዋል።

የሻሸመኔ ወረዳ አስተዳዳሪ አቶ አወል ዋፎ÷ ድርጅቱ በወረዳው ላይ ላቀረበው ቅሬታ ቅድሚያ ታወሮቹ ተሟልተው ስለመገጠማቸው ማረጋገጫ የለኝም ሲሉ ምላሽ ሰጥተዋል።

ተቋሙ አመታትን በዘለቀው የታወር ዝርፊያ የማስፋፊያ ስራ ከመስራት ይልቅ የተዘረፈውን በመተካት እየተጎዳ ነው ያሉት አቶ አለማየሁ÷ የፌደራል መንግስት መፍትሔ እንዲሰጥበት ጠይቀዋል።

በመቅደስ አስፋው

ወቅታዊ፣ትኩስ እና የተሟሉ መረጃዎችን ለማግኘት፡-
ድረ ገጽ፦ https://www.fanabc.com/
ፌስቡክ፡- https://www.facebook.com/fanabroadcasting
ዩትዩብ፦ https://www.youtube.com/c/fanabroadcastingcorporate/
ቴሌግራም፦ https://t.me/fanatelevision
ትዊተር፦ https://twitter.com/fanatelevision በመወዳጀት ይከታተሉን፡፡
ዘወትር፦ ከእኛ ጋር ስላሉ እናመሰግናለን!

You might also like

Leave A Reply

Your email address will not be published.