Fana: At a Speed of Life!

የትራንስፖርት እና የውሃ፣መስኖና ኢነርጂ ሚኒስቴር ሰራተኞች ለመከላከያ ሰራዊት የ1 ወር ደመወዛቸውን ለመስጠት ቃል ገቡ

አዲስ አበባ፣ ነሃሴ 3፣ 2013 (ኤፍ ቢ ሲ) የትራንስፖርት ሚኒስቴር፣ የውሃ፣መስኖና ኢነርጂ ሚኒስቴር፣ የመስኖ ልማት ኮሚሽን፣ የውሃ ልማት ኮሚሽን አመራሮችና ሠራተኞች ለመከላከያ ሠራዊት የአንድ ወር ደመዛቸውን ለመስጠት ቃል ገብተዋል፡፡

የውሃ፣መስኖና ኢነርጂ ሚኒስቴር፣ የመስኖ ልማት ኮሚሽን እና የውሃ ልማት ኮሚሽን አመራሮችና ሠራተኞች በዛሬው ዕለት በወቅታዊ ሀገራዊ ጉዳዮች ዙሪያ ተወያይተዋል፡፡

የውሃ፣መስኖና ኢነርጂ ሚኒስትር ዶ/ር ኢ/ር ስለሺ በቀለ ጦር ሜዳ ተሰልፈው ደማቸውን እያፈሰሱ ያሉ የመከላከያ ሠራዊት አባላትን በዚህ መንገድ መደገፍ በትንሹ ሃላፊነትን መወጣት መሆኑን አንስተዋል፡፡

የሺህ ዘመናት ታሪክ ያላትን ሀገር ለማፍረስ የሚደረገውን ሴራ ትውልዱ ተቋቁሞ ሀገርን ማሻገር ይገባል ብለዋል፡፡

ሀገራችንን ከትልቅነት፣ ከማደግና ከመለወጥ ተስፋ ከልማትና ከብልጽግና መስመር ለማውጣት የሚፈልጉትን ሁሉ መቋቋምና ሀገራችንን ማሻገር ከታሪክ ተወቃሽነትም እንደሚያድን ተናግረዋል፡፡

የሚኒስቴር መሥሪያ ቤቱ፣ የመስኖ ልማት ኮሚሽንና የውሃ ልማት ኮሚሽን አመራሮችና ሠራተኞች ከአንድ ወር ደመወዛቸው በተጨማሪ ደም ለመለገስ፣ ለተፈናቀሉ ወገኖችን ቁሳቁሶችን ለማሰባሰብ ስምምነት ላይ መድረሳቸውን ከሚኒስቴሩ ያገኘነው መረጃ ያመላክታል፡፡

የተቋሙ ሰራተኞች ከወር ደመወዛቸው ባለፈ አስፈላጊ ከሆነ ግንባር ድረስ ዘምተው ለመፋለምና ለሀገራቸው መስዋዕትነት ለመክፈል ዝግጁ መሆናቸውን ተናግረዋል፡፡

በተመሳሳይ የትራንስፖርት ሚኒስቴር አመራርና ሰራተኞች ለሀገር መከላከያ ሠራዊት የወር ደመወዛቸውን ከመስጠት ባለፈ ለማንኛዉም ሀገራዊ ጥሪም ዝግጁ መሆናቸዉን አረጋግጠዋል፡፡

የትራንስፖርት ሚኒስትር ዳግማዊት ሞገስ ሀገራችን በአባቶቻችን መስዋዕትነት ለዘመናት ክብሯና ነጻነቷ ተጠብቆ የኖረች፣ ሰንደቅ ዓለማዋ በዓለም መድረኮች ሁሉ ከፍ ብሎ የተውለበለበ፣ በየትኛዉም ዓለማዊ ህብረቶችና መድረኮች መስራች የሆነች ሀገር መሆኗን አውስተዋል፡፡

ዛሬም እኛ ልጆችዋ አባቶቻችን እንዳደረጉት ሁሉ ልናደርግ ይገባል ማለታቸውን ከሚኒስቴሩ ያገኘነው መረጃ ያመላክታል፡፡

የሚኒስቴር መስሪያ ቤቱ አመራርና ሠራተኞችም ሀገራችን ለመታደግ በሚደረገው ሀገራዊ ንቅናቄ ለመቀላቀል ስለተፈጠረው ዕድል በማመስገን ለጊዜው የአንድ ወር ደመወዝ ለመስጠት በሙሉ ፈቃደኝነትመስማማታቸው ተናግረዋል፡፡

በቀጣይ ደም በመለገስ፣ በአልባሳትና በቁሳቁስ በመደገፍ እንዲሁም በማንኛውም ጊዜ ሀገራዊ ጥሪን በመቀበል እስከ ግንባር ድረስ ለመዝመት ዝግጁ መሆናቸውን አረጋግጠዋል፡፡

ወቅታዊ፣ትኩስ እና የተሟሉ መረጃዎችን ለማግኘት፡-
ድረ ገጽ፦ https://www.fanabc.com/
ፌስቡክ፡- https://www.facebook.com/fanabroadcasting
ዩትዩብ፦ https://www.youtube.com/c/fanabroadcastingcorporate/
ቴሌግራም፦ https://t.me/fanatelevision
ትዊተር፦ https://twitter.com/fanatelevision በመወዳጀት ይከታተሉን፡፡
ዘወትር፦ ከእኛ ጋር ስላሉ እናመሰግናለን!

You might also like

Leave A Reply

Your email address will not be published.