Fana: At a Speed of Life!

የድሬዳዋ አስተዳደር በአፋር ክልል አሸባሪው ህወሓት በንጹሃን ዜጎች ላይ በፈፀመው አሰቃቂ ጭፍጨፋ የተሰማውን ሐዘን ገለጸ

አዲስ አበባ፣ ነሃሴ 5፣ 2013 (ኤፍ ቢ ሲ) የድሬዳዋ አስተዳደር በአፋር ክልል ጊዜያዊ መጠለያ ውሰጥ ተጠልለው በነበሩት ላይ አሸባሪው የህወሓት ቡድን በፈፀመው አሰቃቂ ጭፍጨፋ የተሰማውን ሐዘን ገለጸ፡፡
 
የከተማ አስተዳደሩ የተሰማውን ሐዘን አስመልክቶ ያወጣው መግለጫ ሙሉ መልዕክት እንደሚከተለው ይቀርባል፡-
 
የድሬዳዋ አስተዳደር አሸባሪው የህወሓት ጁንታ በአፋር ክልል በፈንቲ ረሱ በጋሊኮማ ጊዚያዊ መጠለያ ውሰጥ በነበሩ ንፁሀን ዜጎች ላይ በፈፀመው አሰቃቂ ጭፍጨፋ የተሰማውን ጥልቅ ሀዘን በራሱና በአስተዳደሩ ነዋሪዎች ስም እየገለፀ ለሟች ቤተሰቦችና ወዳጅ ዘመድ እንዲሁም ለመላው ኢትዮጵያውያን መፅናናትን ይመኛል።
 
አሸባሪው የህውሓት ቡድን ለ27 አመታት የኢትዮጵያን መንግስታዊ ስልጣን ጨብጦ በመራበት ዘመን ጠባብ የቡድን ፍላጎቱን ለማስፈፀም ሲል ሕዝቡን አስተሳስረው የያዙና በዘመናት አብሮ መኖር የዳበሩ መልካም እሴቶችን ለመበጣጠስ እቅድ አውጥቶና በጀት መድቦ የጥላቻ ዘር ሲዘራ የኖረ መሆኑ የአደባባይ እውነት ነው።
 
ይሕ አሸባሪ ቡድን በአገራችን ለውጥ ከመጣ በኋላም ለውጡን ለመቀልበስ ለብዙዎች ሞትና መፈናቀል ምክንያት የሆነ ግጭት ከማስፋፋት አልፎ የአገር ሉአላዊነት ምልክት በሆነው የመከላከያ ሰራዊት ሰሜን እዝ ላይ አስነዋሪ ጥቃት መፈፀሙና አላማዬ ኢትዮጵያን ማፍረስ ነው ብሎ በይፋ ጦርነት ማወጁም ይታወቃል።
 
አሸባሪው የህውሓት ባንዳ አገር የማፍረስ ከንቱ ቅዠቱን ለማሳካትም በአፋር ክልል በከፈተው ጦርነት የዜጎችን ሀብትና ንብረት ማውደሙና ከቀያቸው ማፈናቀሉ አልበቃ ብሎት ተፈናቃዮቹ በሚገኙበት ጊዜያዊ መጠለያ ላይ በፈፀመው በከባድ መሳሪያ የታገዘ ጥቃት ከ240 በላይ ህፃናት ፣ ሴቶች እና አዛውንቶችን ህይወት የቀጠፈ ታሪክ የማይረሳው አረመኔያዊ ጭፍጨፋ ፈፅሟል።
 
በመሆኑም የድሬዳዋ አስተዳደር አሸባሪው የህወሓት ባንዳ ቡድን በንፁሃን የአፋር ክልል ነዋሪዎች ላይ የፈፀመውን አስከፊ ጭፍጨፋ በፅኑ የሚያወግዝና ለሟች ቤተሰብ፣ ለአፋርና ለመላው ኢትዮጵያውያን መፅናናትን የሚመኝ መሆኑን እየገለፀ ኢትዮጲያን ለማዳን የቀረበውን አገራዊ ጥሪ በሙሉ ልብ ተቀብሎ አሸባሪው ህውሓትን ለመደምሰስ የተጀመረው ርብርብ እንዲሳካ ለጀግናው መከላከያ ሰራዊታችን ያለውን የደጀንነት ሚና ለመወጣት በልዩ ትኩረት እንደሚሰራና ትግሉ የሚጠይቀውን ማንኛውም መስዋዕትነት ለመክፈል ዝግጁ መሆኑንም ያረጋግጣል።
 
ነሀሴ 5 ቀን 2013 ዓ.ም
የድሬዳዋ አስተዳደር
ድሬዳዋ/ኢትዮጵያ
You might also like

Leave A Reply

Your email address will not be published.