Fana: At a Speed of Life!

ቱሪዝም ብዙሃኑን ስለሚያሳትፍ በዘርፉ ላይ የግሉ ዘርፍ ተሳትፎ ቁልፍ ሚና ይጫወታል

አዲስ አበባ፣ ነሃሴ 6፣ 2013 (ኤፍ ቢ ሲ) ቱሪዝም ሰፊውን ህዝብ የሚያሳትፍ የልማት መስክ በመሆኑ በየደረጃው አሳታፊ የልማት ስኬት ለማስመዝገብ የግሉ ዘርፍ ተሳትፎ ቁልፍ ሚና እንደሚጫወት የገንዘብ ሚኒስትር ዴኤታ ዶክተር ኢዮብ ተካልኝ ገለፁ፡፡

ቱሪዝም ኢትዮጵያ ከኦዚ ሆስፒታሊቲ እና ቢዝነስ ግሩፕ ጋር የቱሪዝም ዘርፉን መደገፍ የሚያስችል የስምምነት ሰነድ ተፈራርመዋል።

ስምምነቱ የኢትዮጵያን የቱሪዝም ዘርፍ ትክክለኛ መረጃዎች ለአለም አቀፉ ማኀበረሰብ ለማድረስ፣ የዘርፉን የኢንቨስተመንት ግንኙነት ለማሳደግ፣ የቱሪዝም መስተንግዶ ተግባርን ለማጠናከርና ዓመታዊ ፌስቲቫሎችን በኢትዮጵያ ከአለም አቀፍ ተቋማት ጋር ለማስተናገድ ያስችላል ተብሏል፡፡

የገንዘብ ሚኒስትር ዴኤታ ዶክተር ኢዮብ ተካልኝ በፊርማ ስነ ስርዓቱ እንደገለፁት÷ ለዘመናት የተደበቀውን የኢትዮጵያን የቱሪዝም ሃብት አውጥቶ ጥቅም ላይ ማዋል እና ለአለም ማስተዋወቅ ከፍተኛ ትኩረት ተሰጥቶበት ይሠራል ብለዋል፡፡

በቱሪዝም መሰረተ ልማት ላይ የሚታዩ ችግሮችን ለመፍታት ቅድሚያ ተሰጥቶ እንደሚሰራም ነው የገለፁት፡፡

የቱሪዝም ኢትዮጵያ ዳይሬክትር አቶ ስለሺ ግርማ በበኩላቸው÷ መንግስት በዘርፉ ከፍተኛ ማሻሻያዎችን በማድረግ በተለያዩ አካባቢዎች ገበታ ለሃገር በሚል የቱሪዝም መዳረሻዎችን እያለማ እንደሚገኝ ተናግረዋል፡፡

በሌላ በኩል መንግስት ከግሉ ሴክተር ጋር በጋራ መስራትን የሴክተሩ ማሻሻያ አካል አድረጎ ወደ እንቅስቃሴ ገብቷልም ነው ያሉት፡፡
የዛሬው ስምምነትም እነዚህን እቅዶች ወደ ተግባር ለማስገባት የሚያስችል መሆኑን መግለጻቸውን ኢዜአ ዘግቧል፡፡

መንግስት የዘርፉን ኢንቨስትመንት ለማሳደግም በቱሪዝም መዳረሻዎች ላይ ባለሃብቶች እንዲሳተፉ ልዩ ልዩ ማበረታቻዎች ማድረጉን አስታውቀዋል።

የኦዝ ሆስፒታሊቲ እና ቢዝነስ ግሩፕ ኃላፊ አቶ ቁምነገር ተከተል ስምምነቱን ወደ ተግባር በመለወጥ እንደሚሰራ ተናግረው÷ ከተሞችን፣ መዳረሻዎችንና ያልታዩ የቱሪዝም መስህቦችን በማስተዋወቅ ከዘርፉ የሚገኘው ገቢ በከፍተኛ ሁኔታ ለማሳደግ የድርሻቸውን እንደሚወጡ ገልጸዋል፡፡

ወቅታዊ፣ትኩስ እና የተሟሉ መረጃዎችን ለማግኘት፡-
ድረ ገጽ፦ https://www.fanabc.com/
ፌስቡክ፡- https://www.facebook.com/fanabroadcasting
ዩትዩብ፦ https://www.youtube.com/c/fanabroadcastingcorporate/
ቴሌግራም፦ https://t.me/fanatelevision
ትዊተር፦ https://twitter.com/fanatelevision በመወዳጀት ይከታተሉን፡፡
ዘወትር፦ ከእኛ ጋር ስላሉ እናመሰግናለን!

You might also like

Leave A Reply

Your email address will not be published.