Fana: At a Speed of Life!

የኢትዮጵያን እንጀራ እየበሉ ኢትዮጵያን መልሶ መውጋት ተገቢ አይደለም-ፕሮፌሰር ታከለ ታደሰ

አዲስ አበባ፣ ነሃሴ 6፣ 2013 (ኤፍ ቢ ሲ)የኢትዮጵያን እንጀራ እየበሉ ኢትዮጵያን መልሶ መውጋት ተገቢ አይደለም ሲሉ የወላይታ ሶዶ ዩኒቨርስቲ ፕሬዚዳንት ፕሮፌሰር ታከለ ታደሰ ተናገሩ።

ሀገር ምጥ ላይ እያለች የተደላደለ ኑሮ መኖር ጤነኝነት አይመስልም ያሉት የወላይታ ሶዶ ዩኒቨርስቲ ፕሬዚዳንት፥ የሀገር መከላከያ ሰራዊቱን መደገፍ ራስን የማዳን ብቸኛ አማራጭ ነውም ነው ያሉት ።

ፕሬዚዳንቱ ይህንን የተናገሩት በዛሬው እለት ከአጠቃላይ ወላይታ ሶዶ ዩኒቨርስቲ ማህበረሰብ አባላት ጋር በተደረገው ውይይት ነው።

በዚህ ውይይትም ለመከላከያ ሰራዊቱ ቋሚ ድጋፍ ለማድረግ ተወስኗል።

ሀገር የማዳን ተግባር ከሁሉም ስለሚቀድም ከምንም በላይ ቆራጥ መሆን ያስፈልጋል ነው የተባለው ።

በዚህም በቀዳሚነት ከዩኒቨርስቲው በጀት የ2ሚሊየን ብር ድጋፍ ለማድረግ ቃል የተገባ ሲሆን፥ የዩኒቨርስቲው ማህበረሰብ አባላትም የአንድ ወር ደሞዛቸውን ለግሰዋል ።

በዱር በገደሉ ከተፈጥሮና ከሰው አውሬ ጋር የሚዋደቀውን የህዝብ ልጅ በቀጥታ ተሳትፎ ፣ በሞራል ፣ በገንዘብና በመሳሰሉት አማራጮች ከጎኑ ሆኖ መደገፍ ተገቢ መሆኑ ተመላክቷል።

በመሆኑም ዩኒቨርስቲው ከሚያደርጋቸው ድጋፎች የሕክምና ባለሙያዎችን በዘመቻው ማሳተፍ አንዱ ነው ተብሏል።

ሠላማችንን እያስከበሩ መስዋዕት ሆነውና ቆስለው የተጎዱ ልበ ኩሩ የሀገር መከላከያ ሠራዊት ማከም የኢትዮጵያን ሕዝብ ልብ ማከም ነውም ነው የተባለው ።

ባለፉት 27 አመታት የጭካኔና ግፍ ተምሳሌት ሆኖ የኢትዮጵያን ህዝብ በመከፋፈል ለሌሎች የውጭ ኃይላት አሳልፎ የሰጠው ፀረ ሠላሙ ሕወሓት ሀገራችንን የመበጣጠስ አላማ ይዟል ነው ያሉት ፕሮፌሰር ታከለ።

ከጁንታው ባልተናነሰ መልኩ በሰላማዊ ህዝብ ስር ተወሽቀው ሐሰተኛ መረጃ የሚነዙ ሆድ-አደር ተላላኪዎች ተለቅመው እንዲወገዱ ጠንካራ አቋም መያዙም ተነግሯል።

የሀገር ገበና እያራቆተ እድገትና ለውጧን የኋሊት የጎተተውን ተስፋቢስ ቡድንና የሱን ታማኝ ተላላኪ ባንዳ በተባበረ ክንድ ማስወገድ ያስፈልጋልም ነው የተባለው።

ዶክተር አብርሃም ቦሻ የአስተዳደርና ተማሪዎች ጉዳይ ምክትል ፕሬዚዳንት፥ የውጭ ኃይል እንኳን ሊጨቁናት በማይችልበት ሁኔታ ኢትዮጵያን በአምባገነንነት የረገጣት ሕወሓት ከዚህ ቀደም ያቆሰላት ሳያንስ አይኑን በጨው አጥቦ ሠላሟን ሊያናጋ ይፍጨረጨራልና ከሀገር መከላከያ ጎን በመቆም ጥረቱን ማኮላሸት ይገባል ብለዋል።

የኦቶና ማስተማሪያና ሪፌራል ሆስፒታል ቺፍ ክሊኒካል ዳይሬክተር ዶክተር ሉቃስ ዲንጋቶ፥ የወር ደሞዝ ጨምሮ አስፈላጊ የሕክምና ድጋፍ ለማድረግ መወሰናቸውን ገልፀዋል።

የዩኒቨርስቲው ቢዝነስና ልማት ምክትል ፕሬዚዳንት ዶክተር ተክሌ ሌዛ ፥የሀገር መከላከያ ሰራዊት ለደህንነቱ ሳይሳሳ ራሱን አሳልፎ ሲሰጥ እንደ አንድ ተቋም የወላይታ ሶዶ ዩኒቨርስቲ ድጋፉ ቋሚና ከፍ ያለ ሊሆን ይገባል ብለዋል።

የልማት ስራ ባልተረጋጋ ኢኮኖሚ ስለሚደናቀፍ ሰላምን የህልውና ጉዳይ በማድረግ ከመንግሥትም ጎን በመቆም የጁንታውን አከርካሪ መስበር አስፈላጊ እንደሆነ አሳስበዋል።

በመለሰ ታደለ

ወቅታዊ፣ትኩስ እና የተሟሉ መረጃዎችን ለማግኘት፡-
ድረ ገጽ፦ https://www.fanabc.com/
ፌስቡክ፡- https://www.facebook.com/fanabroadcasting
ዩትዩብ፦ https://www.youtube.com/c/fanabroadcastingcorporate/
ቴሌግራም፦ https://t.me/fanatelevision
ትዊተር፦ https://twitter.com/fanatelevision በመወዳጀት ይከታተሉን፡፡
ዘወትር፦ ከእኛ ጋር ስላሉ እናመሰግናለን!

You might also like

Leave A Reply

Your email address will not be published.