Fana: At a Speed of Life!

በጋምቤላ ክልል በፀጥታ ስጋት የተጠረጠሩ 93 ግለሰዎች በቁጥጥር ሥር ዋሉ

አዲስ አበባ፣ ነሃሴ 7፣ 2013 (ኤፍ ቢ ሲ) በጋምቤላ ክልል ባለፉት ሶስት ቀናት በተካሄደ እንቅስቃሴ በፀጥታ ስጋት የተጠረጠሩ 93 ግለሰዎች በቁጥጥር ሥር መዋላቸውን የክልሉ ሰላምና ጸጥታ ጉዳዮች ቢሮ አስታወቀ።

የቢሮው ኃላፊ አቶ ቶማስ ቱት ለኢዜአ እንደተናገሩት፤ ክልሉ ጠረፋማ ከመሆኑ ጋር ተያይዞ የትህነግ ርዝራዥና ሌላም የሽብር ቡድን ሰርገው እንዳይገቡ ብሄራዊ መረጃና ደህንነት አገልግሎት፣የክልሉና በፌዴራል ፖሊስ ቅንጅታዊ የሰላምና ጸጥታ ማስከበር ሥራ እያካሄዱ ይገኛሉ።

ባለፉት ሶስት ቀናት በተደረገው ክትትል በጋምቤላ ከተማ፣ በዋንታዋር እና በላሬ ወረዳዎች በፀጥታ ስጋት የተጠረጠሩ 93 ግለሰቦች በቁጥጥር ሥር መዋላቸውን አስታውቀዋል።

ከነዚህም በዋንታዋርና በላሬ ጠረፋማ ወረዳዎች በሚገኙ በቡርቤና በፈጋግ መውጫና መግቢያ በሮች በተደረገው ክትትል የተያዙ 13 ተጠርጣሪዎች እንደሚገኙበት አቶ ቶማስ አመላክተዋል።

ቀሪዎቹ ትናንት በጋምቤላ ከተማ በተደረገ ድንገተኛ አሰሳ መታወቂያ ካርድ የሌላቸው ግለሰቦች በሆቴሎች በቡድን ተኝተው የተገኙ ሲሆን ከመካከላቸውም የውትድርና ሙያ እንዳላቸው ምልክቶች የታዩባቸው አሉ።

በተለይም ከደቡብ ሱዳን ጋር በሚያገናኙት በቡርቤና በፈጋግ መሥመሮች የተያዙት ተጠርጣሪዎች ሁሉም የትግሪኛ ቋንቋ ተናጋሪዎች እንደሆኑ ነው የክልሉ ሰላምና ጸጥታ ጉዳዮች ቢሮ ኃላፊው ያመለከቱት።

በላሬ ወረዳ በፈጋግ መውጫና መግቢያ በር ከተያዙ ተጠርጣሪዎች የሀገር መከላከያ ሠራዊትና የፌዴራል ፖሊስ የደንብ አልባሳትና ማዕረግ መገኘቱን አስረድተዋል።

በተጨማሪም ከ700 ሺህ በላይ ብር፣ ከ2 ሺህ 500 በላይ የደቡብ ሱዳን ፓወንድና የሶማሊያ ሽልንግ ተይዟል ብለዋል።

በተጠርጣሪዎቹ ላይ የምርመራና የማጣራት ሥራ እየተካሄደ እንደሚገኝ ያስረዱት ኃላፊው፤ ምርመራው እንደተጠናቀቀም ጉዳያቸው ወደ ፍርድ ቤት እንደሚላክ አስታውቀዋል።

ተጠርጣሪዎቹን በቁጥጥር ሥር ለማዋል የህብረተሰቡ ድጋፍና ትብብር የላቀ እንደነበረ ጠቅሰው፤በቀጣይም እንዲሁ እንዲያጠናከር ጠይቀዋል።

You might also like

Leave A Reply

Your email address will not be published.