Fana: At a Speed of Life!

ሰዎችን በማገት፣በማሰቃየትና ገንዘብ በመቀበል ወንጀል የፈፀሙ አራት ግለሰቦች በእድሜ ልክ እስራት ተቀጡ

አዲስ አበባ ፣ ነሐሴ 10፣ 2013 (ኤፍ ቢ ሲ) ሰዎችን በማገት፣በማሰቃየትና ገንዘብ በመቀበል ወንጀል የፈፀሙ አራት ግለሰቦች በእድሜ ልክ እስራት መቀጣታቸውን የፌደራል ፖሊስ ወንጀል ምርመራ ቢሮ አስታወቀ፡፡

ግለሰቦቹ የታጋቾቹን እጅና እግር አስሮ በመግረፍና በውሃ ጥም በማሰቃየት እንዲሁም በሚጠጡት ውሃ ላይ ጋዝ በመጨመር የስምንት ሰዎች ህይወት በግፍ እንዲያልፍ ማድረጋቸውም ተገልጿል፡፡

ታጋቾቹን ወደ ቤተሰቦቻቸው ስልክ በማስደወልና የስቃይ ድምፃቸውን በማሰማት ቤተሰብን ቤት፣ መኪና እና ሌሎች ንብረት በማሸጥ ገንዘብ እንዲላክላቸው ማድረጋቸውና የተጠዩቁት ገንዘብ ያልሞላላቸው የታጋች ቤተሰብ ደግሞ ከሰው ለምነው ያገኙትን ገንዘብ ቢከፍሉም ህይወት መታደግ እዳልቻሉ በወንጀል ምርመራ ቢሮ የህገ-ወጥ የሰዎች ዝውውር የምርመራ ክፍል ገልጿል፡፡

የተደራጁ እና ድንበር ተሻጋሪ ወንጀሎች ዳይሬክቶሬት ለአራት ወራት ከምርመራ ቡድኑ ጋር በቅንጅት ባከናወነው ምርመራ መዝገብ በማደራጀት ለፌዴራል ጠቅላይ ዐቃቤ ህግ በመላክ ክስ እንዲመሰረትባቸው ማድረጉ ነው የተገለፀው፡፡

የፌደራል ከፍተኛ ፍርድ ቤት ልደታ ምድብ ችሎት ክሱን ከተመለከተ በኋላ ግለሰቦቹ ጥፋተኛ ሆነው በመገኘታቸው ኪዳኔ ዘካሪያስ የተባለው በእድሜ ልክ ፅኑ እስራት እና በ1 ሚሊየን ብር የገንዘብ መቀጮ፣ አማኑኤል ይርጋን በ18 ዓመት ፅኑ እስራት፣ ሲሳይ ወዳፍይን በ16 ዓመት እንዲሁም ሳባ መንደር የተባለውን በ12 ዓመት እና በ75 ሺህ የገንዘብ መቀጮ እንዲቀጡ መወሰኑን ከኢትዮጵያ ፌዴራል ፖሊስ ኮሚሽን ያገኘነው መረጃ ያመላክታል፡፡

መሰል የወንጀል ድርጊቶች ሲፈፀሙ ህብረተሰቡ ለፖሊስ ጥቆማ በመስጠት እንዲተባበር እንዲሁም በህገ-ወጥ መንገድ ገንዘብ ከፍለው ልጆቻቸውን እና ቤተሰቦቻቸውን ወደ ውጭ ሀገር ከመላክ እንዲቆጠቡ የወንጀል ምርመራ ቢሮው መልዕእክቱን አስተላልፏል፡፡

You might also like

Leave A Reply

Your email address will not be published.