Fana: At a Speed of Life!

ምስራቅ አፍሪካን የክህሎት የልህቀት ማዕከል ለማድረግ የተቀረጸው ፕሮጀክት አፈጻጸም መጓተቱ ተገለጸ

አዲስ አበባ፣ ነሐሴ 10፣ 2013 (ኤፍ ቢ ሲ)የቴክኒክና ሙያ ትምህርትና ስልጠና ኮሌጆችን የምስራቅ አፍሪካ የክህሎት የልህቀት ማዕከል ለማድረግ የተቀረጸው ፕሮጀክት አፈጻጸም መጓተቱ ተመለከተ።

የሳይንስና ከፍተኛ ትምህርት ሚኒስቴር ከሁሉም ክልሎች የዘርፍ አመራሮችና የቴክኒክና ሙያ ትምህርትና ስልጠና ኮሌጅ ዲኖች ጋር የፕሮጀክቱን አፈጻጸመ በአዳማ ከተማ እየገመገመ ነው።

በመድረኩ የሳይንስና ከፍተኛ ትምህርት ሚኒስትር ዶክተር ሳሙኤል ኡርቃቶ እንዳሉት÷ ተቀርጾ ተግባራዊ ሲደረግ የቆየው ፕሮጀክቱ በዝቅተኛና መካከለኛ ደረጃ ብቁና ጥራት ያለው የሰለጠነ የሰው ሃይል ለማፍራት ታስቦ ነው።

ስራ ፈላጊ ሳይሆን ስራ ፈጣሪ፣ በዕውቀትና ክህሎት የበቃ የሰው ሃይል ለማፍራት መሰረት የሚጥል ፕሮጀክት እንደሆነም አመላክተዋል።
በተለይም መንግስት የቴክኒክና ሙያ ትምህርትና ስልጠና ኮሌጆች ሙሉ በሙሉ ተግባር ተኮር ስልጠና እንዲሰጡ ፖሊሲ፣ ስትራቴጂና ስርዓተ ትምህርት በአዲስ መልክ በመቅረፅ ወደ ትግበራ መግባቱንም አስታውሰዋል።

እስካሁን በተከናወኑት ስራዎች ሲታይ ግን ፕሮጀክቱን የምስራቅ አፍሪካ የክህሎት የልህቀት ማዕከል ለማድረግ ከተቀመጠው ግብ አንጻር ብዙ ስራዎች እንደሚቀሩት ታይቷል ብለዋል።

በፕሮጀክቱ የአንድ ዓመት ቆይታ በተቋማቱና በክልሎች አለመሰራቱን የገለጹት ሚኒስትሩ፤ ለወደፊቱም በተለመደው አካሄድ ሄደን ምንም ዓይነት ውጤት አናመጣም ነው ያሉት።

ችግሩን በፍጥነት ለመፍታት የኮሌጅ ዲኖች፣ የክልል የትምህርት ቢሮዎች፣ የየክልሎቹ መንግስታትና የአካባቢው አስተዳድሮች ተገቢውን ትኩረት ማድረግ ይገባል ማለታቸውን ኢዜአ ዘግቧል።

መንግስት ከሰጠው አቅጣጫ አንጻር የእስካሁኑ የኮሌጆቹ አፈጻጸም ዝቅተኛ መሆኑን የገለጹት ደግሞ የፌደራል ቴክኒክና ሙያ ትምህርትና ስልጠና ኤጄንሲ ዋና ዳይሬክተር አቶ ጌታቸው ነጋሽ ናቸው።

ወቅታዊ፣ትኩስ እና የተሟሉ መረጃዎችን ለማግኘት፡-
ድረ ገጽ፦ https://www.fanabc.com/
ፌስቡክ፡- https://www.facebook.com/fanabroadcasting
ዩትዩብ፦ https://www.youtube.com/c/fanabroadcastingcorporate/
ቴሌግራም፦ https://t.me/fanatelevision
ትዊተር፦ https://twitter.com/fanatelevision በመወዳጀት ይከታተሉን፡፡
ዘወትር፦ ከእኛ ጋር ስላሉ እናመሰግናለን!

You might also like

Leave A Reply

Your email address will not be published.