Fana: At a Speed of Life!

ፌዴራል ፖሊስ ህወሓት ትንኮሳ ያደረገባቸውን ስትራቴጂክ ቦታዎች አስለቀቀ

አዲስ አበባ፣ ነሐሴ 11 ፣ 2013 (ኤፍ ቢ ሲ) አሸባሪው የህወሓት ቡድን ትንኮሳ ያደረገባቸውን ስትራቴጂክ ቦታዎች የኢትዮጵያ ፌደራል ፖሊስ ከሌሎች የፀጥታ አካላት ጋር በመሆን ማስለቀቁን አስታውቋል፡፡
 
አሸባሪው ህወሓት ቆቦ ከተማን በመቆጣጠር ወደ ሌሎች የሀገራችን አካባቢዎች በቀላሉ ለማለፍ በተለምዶ የአርሴማ ተራሮች የተባሉ አራት ተራሮችን እስከ ሀምሌ 14 ቀን 2013 ዓ.ም ተቆጣጥሮ ለቆቦ ከተማ ነዋሪዎች ከፍተኛ ስጋት ሆኖ ቆይቷል፡፡
 
ይሁን እንጂ የፌዴራል ፖሊስ ሰሜን ዳይሬክቶሬት ዲቪዥን አራት ፈጥኖ ደራሽ አባላት ከሀገር መከላከያ ሠራዊና ከሌሎች የፀጥታ አካላት ጋር በመቀናጀት በርካታ የጁንታውን ሃይል በመደምሰስ አራቱንም ተራሮች በአንድ ቀን በማስለቀቅ ለአካባቢው ሚሊሺያ ማስረከብ መቻላቸው ተገልጿል፡፡
 
የጠላትን ግብዓተ መሬት ሳንፈጽም አንመለስም ያሉት የሰሜን ዳይሬክቶሬት ፈጥኖ ደራሽ ፖሊስ ሻለቃ ምክትል አዛዥ ኢንስፔክተር ሀሰን አብዱ÷የፌዴራል ፖሊስ አባላቱ ከሀገር መከላከያ ሰራዊትና ከሌሎች የፀጥታ አካላት ጋር በመቀናጀት አሸባሪውን የህወሓት ጁንታ ቡድን አይቀጡ ቅጣት በመቅጣት የተማመነባቸውን ስትራቴጂክ ቦታዎች አስለቅቋል፡፡
 
በዚህም የሽብር ቡድኑን ጀሌዎች በመደምሰስ ለአካባቢው ማህበረሰብ መረጋጋት መፍጠር መቻሉን ነው የገለጹት፡
 
አባላቱ በአሁኑ ወቅት ወደ ሌላ ግዳጅ ለመሰማራት ዝግጅታቸውን አጠናቀው ትእዛዝ እየተጠባበቁ መሆናቸውን አንስተዋል፡፡
 
በቀጣይም አሸባሪውን ለአንዴና ለመጨረሻ ጊዜ ለማጥፋት ዝግጁ መሆናቸውን የፈጥኖ ደራሽ አባላቱ ተናግረዋል።
 
ጦርነት የገጠምነው ጉድጓድ ውስጥ ተደብቆ እንደገና ወረራ ከፈፀመ ሃይል ጋር በመሆኑ ተራራ ሲይዝ ተስፋ ባለመቁረጥ፤ ተራራ ሲለቅ “ተሸነፈ” ብለን ሳንዘናጋና ሳንደናገጥ ተልዕኳችንን በብቃት መወጣት ይገባናል ነው ያሉት፡፡
 
ለሀገር ሉዓላዊነት ሲባል ህዝባችንን ከጎናችን በማሰለፍና ጁንታውን እስከመጨረሻው ለማጥፋት መስዋዕትነት ለመክፈል ዝግጁ መሆናቸውን ከፌዴራል ፖሊስ ኮሚሽን ያገኘነው መረጃ ያመላክታል፡፡
 
ትኩስ እና የተሟሉ መረጃዎችን ለማግኘት፡-
ድረ ገጽ፦ https://www.fanabc.com/
ፌስቡክ፡- https://www.facebook.com/fanabroadcasting
ዩትዩብ፦ https://www.youtube.com/c/fanabroadcastingcorporate/
ቴሌግራም፦ https://t.me/fanatelevision
ትዊተር፦ https://twitter.com/fanatelevision በመወዳጀት ይከታተሉን፡፡
ዘወትር፦ ከእኛ ጋር ስላሉ እናመሰግናለን!
You might also like

Leave A Reply

Your email address will not be published.