Fana: At a Speed of Life!

የኢትዮጵያ ኤሌክትሪክ ሃይል 191 ነጥብ8 ቢሊየን ብር ዕዳ ተሰርዞ ወደካፒታል እንዲዞር ተደረገ

አዲስ አበባ፣ ነሃሴ 12፣ 2013(ኤፍ ቢ ሲ)የኢትዮጵያ ኤሌክትሪክ ሃይል ከኢትዮጵያ ንግድ ባንክ ከወሰደው ብር ውስጥ 50 በመቶ ማለትም 191 ነጥብ8 ቢሊየን ብር ዕዳ ተሰርዞ ወደካፒታል እንዲዞር ተወስኗል፡፡

የገንዘብ ሚኒስቴር፣ የመንግስት ዕዳና ሀብት አስተዳደር ኮርፖሬሽን፣ የኢትዮጵያ ንግድ ባንክ እና የኢትዮጵያ ኤሌክትሪክ ኃይል ዛሬ የአራትዮሽ ስምምነት አድርገዋል፡፡

በዚህም የኢትዮጵያ ኤሌክትሪክ ሃይል እ.ኤ.አ. ከ2004 እስከ 2016 ከንግድ ባንክ የወሰደው ብድር ሙለ በሙለ እንዲሁም በ2017 የወሰደው ብድር በከፊል ወደካፒታል እንዲዞርለት ተወስኗል፡፡

ተቋሙ እ.ኤ.አ. ከ2017 ወዲህ ከኢትዮጵያ ንግድ ባንክ የወሰዳቸውን ቀሪ ብድሮች ግን በራሱ እንደሚከፍል ለፋና ብሮድካስቲንግ ኮርፖሬት በላከው መግለጫ አስታውቋል፡፡

የዕዳ ስረዛው ተቋሙን 191 ነጥብ 8 ቢሊየን ብር ከነወለዱ የሚያስቀርለት ሲሆን÷ በተያዘው በጀት ዓመት 17 ነጥብ 25 ቢሊየን ብር እንዲሁም በቀጣይ በጀት ዓመት 18 ነጥብ 81 ቢሊየን ብር ወለድ ከመክፈል ታድጎታል፡፡

በተያዘው በጀት ዓመት ይከፈል የነበረው የ17 ነጥብ 25 ቢሊየን ብር ወለድ የተቋሙን የ2013 በጀት ዓመት ገቢ ከ85 በመቶ በላይ ይሸፍናል፡፡

የዕዳ ስረዛው የተቋሙን ዕዳ ወደ ካፒታልነት ስለሚያዞረው የሂሳብ መዝገቡን እንደሚያስተካክለው የተገለጸ ሲሆን÷ ተቋሙን ጠንካራና ተወዳዳሪ በማድረግ ወደፊት ለሚያከናውናቸው ሥራዎች አቅም እንደሚፈጥርለት ይታመናል፡፡

በተጠናቀቀው በጀት ዓመት የተቋሙ አጠቃላይ ገቢ 13ነጥብ 2 ቢሊየን ደርሷል፡፡

አፈፃፀሙ ከእቅድ አንፃር 101 በመቶ የደረሰ ሲሆን÷ ክንውኑ ተቋሙ የራሱን ወጪ በራሱ መሸፈን የሚችልበት ደረጃ ላይ እየደረሰ ለመሆኑ ማሳያ ነው፡፡

በስምምነቱ መሰረት አበዳሪው የኢትዮጵያ ንግድ ባንክ 191 ነጥብ 8 ቢሊየን ብሩን የሚጠይቀው ከተቋሙ ሳይሆን አዲስ ከተቋቋመው የመንግስት ዕዳና ሀብት አስተዳደር ኮርፖሬሽን ላይ ይሆናል፡፡

ከፍተኛ ዕዳ ካለባቸው የመንግስት የልማት ድርጅቶች መካከል የኢትዮጵያ ኤሌክትሪክ ኃይል፣ የስኳር ኮርፖሬሽን፣ የቀድሞ የብረታብረትና ኢንጂነሪንግ ኮርፖሬሽን፣ የኬሚካሌ ኢንደስትሪ፣ የምድር ባቡር ኮርፖሬሽንና የኢትየጵያ አገልግሎት ዕዳ እንዲሰረዝ የሚያደርግ ውሳኔ መተላለፉ ይታወሳል፡፡

ወቅታዊ፣ትኩስ እና የተሟሉ መረጃዎችን ለማግኘት፡-
ድረ ገጽ፦ https://www.fanabc.com/
ፌስቡክ፡- https://www.facebook.com/fanabroadcasting
ዩትዩብ፦ https://www.youtube.com/c/fanabroadcastingcorporate/
ቴሌግራም፦ https://t.me/fanatelevision
ትዊተር፦ https://twitter.com/fanatelevision በመወዳጀት ይከታተሉን፡፡
ዘወትር፦ ከእኛ ጋር ስላሉ እናመሰግናለን!

You might also like

Leave A Reply

Your email address will not be published.