Fana: At a Speed of Life!

ህብረተሰቡ ግንባር ለዘመቱ ቤተሰቦች የእርሻ ስራ እገዛ እያደረገ ነው- የአማራ ክልል ግብርና ቢሮ

አዲስ አበባ፣ ነሃሴ 12፣ 2013(ኤፍ ቢ ሲ)ህብረተሰቡ የክተት ጥሪውን ተቀብለው በህልውና ዘመቻው በግንባር እየተፋለሙ ለሚገኙ የሚሊሻ ቤተሰቦች በእርሻ ስራ እገዛ እያደረገ መሆኑን አስታወቀ።

የቢሮው የሰብል ልማት ባለሙያ ወይዘሮ እንየ አሰፋ ለኢዜአ እንደገለጹት÷አሸባሪው የህውሓት ቡድን በህዝብና በሃገር ላይ እያደረሰ ያለውን በደል ለመፋለም የክተት ጥሪውን ተቀብልው በግንባር እየተፋለሙ ለሚገኙ የሚሊሻ አባላት ቤተሰቦች በተደራጀ አግባብ እገዛ እየተደረገ ነው፡፡

በክልሉ በተለያዩ አካባቢዎች ባለፉት ጥቂት ቀናት ብቻ በህብረተሰብ ተሳትፎ ከ11 ሺህ የሚበልጡ የሚሊሻ አባላት ይዞታ የሆነ 21 ሺህ ሄክታር መሬት ታርሶ በዘር መሸፈኑን ገልፀዋል፡፡

በተጨማሪም አረም የማረም ሥራዎች መከናወኑንም ነው ባለሙያዋ የገለፁት፡፡

በክልሉ በተለያዩ አካባቢዎች እስካሁን ከ143 ሺህ በላይ የህብረተሰብ ክፍሎችን ያሳተፈ የሚሊሻ ቤተሰቦችን በእርሻ ስራ የመደገፍ ስራ እየተካሄደ መሆኑን ተናግረዋል፡፡

በየአካባቢው የሚገኙ የግብርና ባለሙያዎችና የቀበሌ አመራሮችም የእርሻ ስራውን በቅርበት በመከታተል እያስፈፀሙ እንደሚገኙም ነው ያስታወቁት፡፡

በባህር ዳር ዙሪያ ወረዳ የወንጀጣ ቀበሌ ነዋሪ አርሶ አደር ጌትነት እስከዚያ በሰጡት አስተያየት÷ ወደ ግንባር የዘመቱ ሁለት የሚሊሻ አባላት ዘርተው ለሄዱት በቆሎ የኩትኳቶና የማረም ስራ ማከናወናቸውን ገልጸዋል፡፡

“የሶስት ሚሊሻ አባላት ይዞታ በሆነ አንድ ሄክታር ተኩል የበቆሎ፣ የዳጉሳና የበርበሬ ማሳ ላይ በልማት ቡድን አማካኝነት የአረም ስራ ተከናውኗል” ያሉት ደግሞ አርሶ አደር አዘነ ዳኘ ናቸው፡፡

”ዘማች የሚሊሻ አባላት ድል አድርገው ወደ ቤታቸው እስኪመለሱ ድረስ ቤተሰባቸውን የመንከባከብና የመደገፍ ሃላፊነት አለብን” ብለዋል፡፡
ሰብላቸውን አጭደውና ወቅተው እስከማስገባት ድረስ እገዛ እንደሚያደርጉላቸውም አመላክተዋል፡፡

ወቅታዊ፣ትኩስ እና የተሟሉ መረጃዎችን ለማግኘት፡-
ድረ ገጽ፦ https://www.fanabc.com/
ፌስቡክ፡- https://www.facebook.com/fanabroadcasting
ዩትዩብ፦ https://www.youtube.com/c/fanabroadcastingcorporate/
ቴሌግራም፦ https://t.me/fanatelevision
ትዊተር፦ https://twitter.com/fanatelevision በመወዳጀት ይከታተሉን፡፡
ዘወትር፦ ከእኛ ጋር ስላሉ እናመሰግናለን!

You might also like

Leave A Reply

Your email address will not be published.