Fana: At a Speed of Life!

ሸኔ ከህወሓት ጋር ጥምረት መፈጸሙ የኦሮሞ ህዝብ ለትግሉ በከፈለው መስዋዕትነት ላይ መሳለቅ ነው-የኦነግ ስራ አስፈፃሚ አባላት

አዲስ አበባ፣ ነሐሴ 12፣ 2013 (ኤፍ ቢ ሲ) ሸኔ ከህወሓት የሽብር ቡድን ጋር የፈጸመው ጥምረት የኦሮሞ ህዝብ ለትግሉ በከፈለው መስዋዕትነት መሳለቅ ነው አሉ የኦሮሞ ነጻነት ግንባር ስራ አስፈፃሚ አባላት።

የኦሮሞ ነጻነት ግንባር ስራ አስፈጻሚ አቶ ቶሌራ አደባ ከፋና ብሮድካስቲንግ ኮርፖሬት ጋር ባደረጉት ቆይታ÷ ህወሓት ባለፉት 30 ዓመታት የስልጣን ዘመኑ ለዕኩልነቱ በታገለው የኦሮሞ ህዝብ ልጆች ላይ ግፍ ሲፈጽም መቆየቱን አስታውሰዋል፡፡

የህውሓት ሽብር ቡድን በስልጣን ዘመኑ በጋንቤላ፣ ሲዳማ፣ ሶማሌ እና አማራ ክልሎች የፈጸማቸው በርካታ ጭፍጨፋዎች የሚዘነጉ አለመሆናቸውንም ጠቅሰዋል፡፡

ለአብነትም  የኦነግ አባላት በሰበብ አስባቡ ኦነግ ናቸሁ በሚል በየቦታው መገደላቸው፣ እግራቸው መቆረጡን እና ቢሾፍቱ ሆራ አርሰዲ በጠራራ ጸሐይ የፈጸመውን ጭፍጨፋ አንስተዋል፡፡

ሸኔ ከአሸባሪው ህወሃት ቡድን ጋር ፈጽሜዋለው ያለውን ጥምረትም በግፍ በፈሰሰው በርካታ የኦሮሞ ልጆች ደም ላይ መሳለቅ ነው ሲሉ ገልጸውታል።

ህወሓት ከምስረታው ጀምሮ እስከ ውድቀቱ በኢትዮጵያ ህዝብ በተለይም በኦሮሞ ልጆች ላይ ጉዳት ከማድረስ ተቆጥቦ አያውቅም ያሉት ደግሞ ሌላኛው የኦሮሞ ነጻነት ግንባር ስራ አስፍፃሚ አባል አቶ ቀጄላ መርዳሳ ናቸው።

አቶ ቀጄላ ህወሓት በስልጣን ዘመኑ መጀመሪያ በኦሮሚያ ወተር፣  በሐማሬሳ፣ ባሌ ጋራ ጂሌ እና በሌሎች አካባቢዎች ዘግናኝ ጭፍጨፋዎች በማድረግ ስራ መጀመሩን ያሰታውሳሉ።

አሁን ሁለቱ ቡድኖች ፈጥረነዋል የሚሉት ትብብርም ይሁን ጥምረት በኦሮሞ ህዝብ ተቀባይነት የሌለውና አሳፋሪ ነው ሲሉ አክለዋል።

ጉዳዩን የተረዳው የኦሮሞ ህዝብም የመንግስት ጥሪ በመቀበል እና በራሱ መነሳሳት በሃገር ላይ የተደቀነውን  አደጋ ለመቀልበስ ልጆቹን ወደ ግንባር ከመላክ ባለፈ አስፈላጊውን ድጋፍ እያደረገ ይገኛል ነው ያሉት፡፡

የሁለቱ ሽብር ቡድኖች ጥምረት ችግሩ ያለው በሰሜን ኢትዮጵያ ብቻ ሳይሆን  በተለያዩ አካባቢዎች ነው የሚል ፕሮፖጋንዳ ለመንዛት ካልሆነ በቀር ጥምረቱ ዋጋ እንዳማይኖርው አብራርተዋል፡፡

ሸኔ እና ህወሓት በኢትዮጵያ ህዝብ ምንም አይነት ተቀባይነት የሌላቸው እና አቅማቸው ተዳክሞ ግብዓተ መሬታቸው የተቃረበ መሆኑንም አንስተዋል፡፡

አሁን የተከፈተብን ጦርነት በግንባር እና በዲፕሎማሲ ነው ያሉት አቶ ቶሌራ÷ ይህንን መመከት የሚቻለውም  አንድነታችን ይበልጥ በማጠናከር መሆኑን ተናግረዋል፡፡

ስለሆነም  ህዝቡ ከመንግስት ጎን በመሰልፍ የሚያድርገውን ድጋፍ እና ተሳትፎ ማጠናክር እና ጠላት ለሚሰነዝረው የመከፋፈል ሙከራ በር መዝጋት ይገባል ነው ያሉት፡፡

አቶ ቀጄላ በኢትዮጵያ ተላላኪ መንግስት ለመመስረት ጥረት ለሚያደርጉ ምዕራባዊያን መጠቀሚያ ለመሆን የሚንቀሳቀሱ ሃይሎች ምንም ውጤት አያገኙም ብለዋል፡፡

በኢትዮጵያ እንዲስተካከሉ የሚፈለጉ ነገሮች በሙሉ ሊስተካከሉ የሚችሉት በህዝብ  ፍላጎት ብቻ መሆን አንዳለባቸውም ጠቁመዋል ።

በውጭ የሚኖሩ የኦሮሞ ተወላጆች እና ሌሎች ኢትዮጵያዊያን ለዲፕሎማሲው ጦርነት የጋራ ፍልሚያ ለሃገር ውስጥ ፈተናውም የገንዝብ ድጋፍ ማድረጋቸውን አጠናክረው እንዲቀጥሉም አባላቱ ጥሪ አቅርበዋል።

በበላይ ተስፋዬ

 

You might also like

Leave A Reply

Your email address will not be published.