Fana: At a Speed of Life!

ህወሓት ያሰማራቸውን ሽብርተኞች በመያዝ ለህግ ማቅረብ የሚያስችል ግብረ ሃይል ተቋቋመ

አዲስ አበባ፣ ነሐሴ 18፣ 2013 (ኤፍ ቢ ሲ) ህወሓት ያሰማራቸውን ሽብርተኞች በመያዝ ለህግ ማቅረብ እና በተደራጁ ወንጀሎች የሚሳተፉ አካላትን በመቆጣጠር የህግ የበላይነት ማስፈን የሚያስችል የጋራ ግብረ ሃይል ተቋቋመ፡፡
 
ግብረ ሃይሉ በኢትዮጵያ ፌደራል ፖሊስ ወንጀል ምርመራ ቢሮ የሚመራው ሲሆን÷ሁሉንም ክልሎች ከሌሎች አጎራባች ክልሎች ከሚገኙ የወንጀል ምርመራ ዘርፎች ጋር በአንድ ያጣመረ መሆኑ ተገልጿል፡፡
 
በኢትዮጵያ ፌደራል ፖሊስ የወንጀል ምርመራ ቢሮ ኃላፊ ምክትል ኮሚሽነር ጄነራል ዘላለም መንግስቴ÷ግብረ ሃይሉ ሀገሪቱ የተለያዩ አካባቢዎች ህወሓት ያሰማራቸውን ሽብርተኞች በመያዝ ለህግ ከማቅረብ ባሻገር በተደራጁ ወንጀሎችና በሌሎች የህግ ጥሰቶች ላይ የሚሳተፉ አካላትን በመቆጣጠር የህግ የበላይነት የሰፈነባትን ሀገር ለማስቀጠል ከፍተኛ ፋይዳ እንደሚኖረው አንስተዋል፡፡
 
ፖሊሳዊ አንድነቱ የጎለበተ ዘመን ተሻጋሪ ተቋም የመገንባቱ ስራም ተጠናክሮ እንደሚቀጥል ነው ጄነራል ዘላለም የተናገሩት፡፡
 
የፖሊስ ተቋም በሀገር ደረጃ ተቀናጅቶ መስራቱ ጊዜው የሚጠይቀውን አገልግሎት ለህዝቡ ተደራሽ ለማድረግ የማይተካ አስተዋጽኦ እንዳለው የገለፁት ምክትል ኮሚሽነሩ÷ፖሊሳዊ የሙያ ነፃነትን በማይጋፋ መልኩ ከሌሎች የፍትህ አካላት ጋር በምርመራው ዘርፍ የሚደረገውን ትብብር ለማሳደግም በተቋማዊ ሪፎርሙ አፅንኦት ተሰጥቶ እየተሰራ መሆኑን ጠቁመዋል።
 
በተካሄደው ግምገማም 1 ሺህ 642 ተጠርጣሪዎች በቁጥጥር ስር መዋላቸው የተገለጸ ሲሆን÷ለአሸባሪው ህገ-ወጥ ተልዕኮ መጠቀሚያ የነበሩ ሆቴሎች፣ ህንፃዎች፣ መጋዘኖች፣ የኢንቨስትመንት እርሻዎች፣ ፋብሪካዎችና ሪል ስቴቶችን ጨምሮ 1ሺህ 616 በሚሆኑ የንግድ ድርጅቶች ላይ እርምጃ መወሰዱ ተጠቅሷል፡
 
ፖሊስ ባከናወነው የጋራ ስራ 58 ሚሊየን ብር በላይ ጥሬ ገንዘብ በቁጥጥር ስር በማዋል 93 የባንክ አካውንቶችንም እንዳይንቀሳቀሱ በማሳገድ የባንክ ደብተሮቹ ምን የህል ገንዘብ እንደያዙ በማጣራት ላይ እንደሚገኝ የጋራ ግብረ ኃይሉ አመራሮች ገልፀዋል፡
 
በቀጣይ የሚከናወኑ የምርመራ ስራዎችን በተጠናከረ ቅንጅት ለማከናወን እንዲረዳ በተዘጋጀዉ እቅድ ላይም ሀገራዊ የፖሊስ የምርመራ የጋራ ግብረኃይሉ ውይይት ማካሄዱን ከፌዴራል ፖሊስ ያገኘነው መረጃ ያመላክታል፡፡

 

ወቅታዊ፣ትኩስ እና የተሟሉ መረጃዎችን ለማግኘት፡-
ድረ ገጽ፦ https://www.fanabc.com/
ቴሌግራም፦ https://t.me/fanatelevision
ትዊተር፦ https://twitter.com/fanatelevision በመወዳጀት ይከታተሉን፡፡
ዘወትር፦ ከእኛ ጋር ስላሉ እናመሰግናለን!
You might also like

Leave A Reply

Your email address will not be published.