Fana: At a Speed of Life!

ዓለም አቀፍ ተራድዖ ድርጅቶች የሚጠበቅባቸውን ድጋፍ አላደረጉም

አዲስ አበባ፣ ነሐሴ 18፣ 2013 (ኤፍ ቢ ሲ) ጦርነት በተከፈተባቸው የአማራ ክልል አካባቢዎች ዓለም አቀፍ ተራድኦ ድርጅቶች ለተፈናቃዮች ተገቢውን ድጋፍ እያደረጉ እንዳልሆነ የአማራ ክልል አደጋ መከላከል ምግብ ዋስትና ፕሮግራም እና ልዩ ድጋፍ የሚያስፈልጋቸው አካባቢዎች ማስተባበሪያ ኮሚሽን አስታወቀ፡፡

አሸባሪው የህወሓት ቡድን በአማራ ክልል በከፈተው ጦርነት ሳቢያ 500 ሺህ ዜጎች መፈናቀላቸውንም ኮሚሽነር ዘላለም ልጅዓለም ተናግረዋል።

በሰው ሰራሽ እና በተፈጥሮ አደጋዎች የተፈናቀሉ የህብረተሰብ ክፍሎችን ለመደገፍ ጥረት እየተደረገ ባለበት ወቅት አሸባሪው የህወሓት ቡድን ጦርነት በክልሉ መክፈቱ የተረጂውን ቁጥር ጨምሮታልም ነው ያሉት።

በጦርነቱ ምክንያት የክልሉ መንግስት ተገቢውን ድጋፍ ለተፈናቃዮች ተደራሽ ማድረግ አለመቻሉንና እስከ አሁን ባለው መረጃ 30ሺህ ኩንታል እህል ለተረጂዎች በመንግስት አቅም መቅረቡን አስታውቀዋል።

በሌላ በኩል ዓለም አቀፍ የእርዳታ ድርጅቶች በጦርነቱ ለተፈናቀሉ ዜጎች የሚጠበቅባቸውን ድጋፍ ማድረግ አልቻሉም የተባለ ሲሆን፣ የሚመለከታቸው ተቋማት ድጋፍ እንዲያደርጉ ተጠይቋል።

በደሴና ጎንደር አካባቢዎች ተፈናቃዮችን ለመደገፍና ለማቋቋም ግብረሃይል ተቋቁሞ እየተሰራ መሆኑም ነው የተመላከተው።

ኮሚሽነሩ÷ ሕብረተሰቡ በየአካባቢው ለተፈናቃዮች የሚያደርገውን ድጋፍ አድንቀው በቀጣይም መንግስት ተደራሽ በማይሆንባቸው አካባቢዎች ትብብራቸውን አጠናክረው እንዲቀጥሉ ጠይቀዋል፡፡

ምናለ አየነው

ወቅታዊ፣ትኩስ እና የተሟሉ መረጃዎችን ለማግኘት፡-
ድረ ገጽ፦ https://www.fanabc.com/
ፌስቡክ፡- https://www.facebook.com/fanabroadcasting
ዩትዩብ፦ https://www.youtube.com/c/fanabroadcastingcorporate/
ቴሌግራም፦ https://t.me/fanatelevision
ትዊተር፦ https://twitter.com/fanatelevision በመወዳጀት ይከታተሉን፡፡
ዘወትር፦ ከእኛ ጋር ስላሉ እናመሰግናለን!

You might also like

Leave A Reply

Your email address will not be published.