Fana: At a Speed of Life!

ወጣቶች በህወሓት ማደናገሪያ ተታለው ወደ ጦርነት መግባት የለባቸውም-በጦርነቱ የቆሰሉ ወጣቶች

አዲስ አበባ ፣ ነሐሴ 19 ፣ 2013 (ኤፍ ቢ ሲ) በአሸባሪው ህወሓት “ማደናገሪያ ተታለው ወጣቶች ወደ ጦርነት እንዳይገቡ” ሲሉ ወደ አፋር ክልል በመግባት በውጊያ ተሰልፈው የቆሰሉ የትግራይ ወጣቶች ተናገሩ፡፡
ወጣቶቹ “ሥራ ታገኛላችሁ” ተብለው በሐሰት ፕሮፓጋንዳ ተታለው ወደ ጦርነት በሶስት ቀን ስልጠና ብቻ መግባታቸውን ተናግረዋል፡፡
መቀሌ ከተማ ተወልዶ ማደጉን የሚናገረው ወጣት በሪሁን ወልዱ የድንጋይ ጫኝና አውራጅ ሠራተኛ ሆኖ ሲሰራ መቆየቱን ይገልጻል፡፡
በዚሁ ሥራውም ከራሱ አልፎ ቤተሰቡን በመርዳት ኑሮውን ይመራ እንደነበር ያስታውሳል፡፡
መከላከያ ሠራዊቱ የተኩስ አቁም በማድረግ ከመቀሌ መውጣቱን ተከትሎ በአሸባሪው ቡድን “ሥራ ታገኛለህ” በሚል የሐሰት ዜና ተታሎ በሦስት ቀን ሥልጠና ጦርነት ውስጥ ተሳትፎ መቁሰሉን አጫውቶናል፡፡
በአፋር ልዩ ኃይል እገዛም ወደ ሆስፒታል ተወስዶ ጥሩ እንክብካቤ እየተደረገለት ይገኛል፡፡
የስምንተኛ ክፍል ተማሪ እንደሆነች የነገረችን የቅሳነት ማስሼ በበኩሏ “ሥራ ታገኚያለሽ” በሚል የውሸት ምዝገባ ተታላ ወደ ጦርነት ማምራቷን ተናግራለች፡፡
በዚህም የአራት ቀን ሥልጠና ያለፍላጎቷ ወደ ጦርነት ገብታ ጉዳት እንደደረሰባት በሀዘን ትናገራለች ፡፡
ወጣት ክብሮም ገብረማርያም በመቀሌ ከተማ በታክሲ ረዳትነት ሙያ በመሰማራት ራሱንና ወላጆቹን በመርዳት ላይ እያለ በአሸባሪው ቡድን የሐሰት ፕሮፓጋንዳ ተታሎ ወደ ጦርነት መግባቱን ይናገራል፡፡
በመቀሌ አካባቢ ኩሃ ተብሎ በሚጠራው ሥፍራ ሦስት ቀን ሥልጠና ተሰጥቶት ወደ አፋር ክልል መላኩን ይገልጻል። በዚያም ጉዳት ደርሶበት ቁስለኛ ሆኗል፡፡
የትግራይ ወጣቶች “ከእኛ ብዙ ነገር ሊማሩ ይገባል” ሲሉም ወጣቶቹ ባስተላለፉት መልዕክት ገልጸዋል፡፡
በአሸባሪው ቡድን የሐሰት ጥሪ ተታለው ለጦርነት መማገድ እንደሌለባቸውም ጥሪ ማቅረባቸውን ኢዜአ ዘግቧል፡፡
በአፋር ክልል ዱብቲ ሪፈራል ሆስፒታል የድንገተኛ ቀዶ ህክምና ስፔሻሊስት ዶክተር ኑሩ ሰይድ እንዳሉትም÷ ቁስለኞቹ ወደ ህክምና ተቋሙ ከገቡ ጊዜ ጀምሮ በሙያቸው አስፈላጊውን ትብብር እያደረጉላቸው ነው።
ለቁስለኞቹም ከፍተኛ ቀዶ ህክምናን ጨምሮ በጉዳታቸው ልክ አስፈላጊ እርዳታ እንደተሰጣቸውም ነው ዶክተር ኑሩ የሚገልጹት።
በዚህም ሦስቱ ወጣቶች ሙሉ በሙሉ በሚባል ደረጃ ማገገማቸውን ገልጸው÷ ቀሪዎቹም በአጭር ጊዜ ወደ ጤንነት እንደሚመለሱም ያላቸውን እምነት ተናግረዋል፡፡
አሸባሪው የህወሓት ቡድን በርካታ ህጻናትንና ወጣቶችን በማታለል ለጦርነት በመማገድ ህይወታቸው በአጭር እንዲቀጭ እያደረገ መሆኑንም እነኚህ ወጣቶች ተናግረዋል፡፡
 
ወቅታዊ፣ትኩስ እና የተሟሉ መረጃዎችን ለማግኘት፡-
ድረ ገጽ፦ https://www.fanabc.com/
ፌስቡክ፡- https://www.facebook.com/fanabroadcasting
ዩትዩብ፦ https://www.youtube.com/c/fanabroadcastingcorporate/
ቴሌግራም፦ https://t.me/fanatelevision
ትዊተር፦ https://twitter.com/fanatelevision በመወዳጀት ይከታተሉን፡፡
ዘወትር፦ ከእኛ ጋር ስላሉ እናመሰግናለን!
You might also like

Leave A Reply

Your email address will not be published.