Fana: At a Speed of Life!

ጠ/ሚ ዐቢይ አገርን ለማዳን ያሳለፉት ውሳኔ በኢትዮጵያ የታሪክ ድርሳን የሚመዘገብ ነው-የፖለቲካ ፓርቲ አመራሮች

አዲስ አበባ፣ህዳር 15፣2014 (ኤፍ ቢ ሲ) ጠቅላይ ሚኒስትር ዐቢይ አህመድ ወደ ግንባር በመዝመት አገርን ለማዳን ያሳለፉት ውሳኔ ወቅቱን የጠበቀና በኢትዮጵያ የታሪክ ድርሳን የሚመዘገብ ነው ሲሉ የፖለቲካ ፓርቲ አመራሮች ገለጹ።
 
ፓርቲዎቹ ወደ ግንባር በመዝመት የሕይወት መስዋዕትነት ለመክፈል ዝግጁ መሆናቸውንም ነው የተናገሩት።
 
የአገሪቷ የጦር ኃይሎች ጠቅላይ አዛዥ ዶክተር ዐቢይ አህመድ አገር ከተቃጣባት የሕልውና አደጋ ለመታደግ ያሳለፉት ውሳኔ ወቅቱን የጠበቅና ታሪክ የማይረሳውም ብለዋል።
 
እንደ ፓርቲ አገርን ከሚበታትን የሕልውና አደጋ ለመታደግ በሚያስፈልገው ሁሉ ከጠቅላይ ሚኒስትሩ ጎን እንደሚቆሙ የትግራይ ዴሞራሲያዊ ፓርቲ ሊቀመንበር ዶክተር አረጋዊ በርሄ ገልጸዋል።
 
ፓርቲያቸው አገርን ለማዳን በሚደረገው ማንኛውም ተግባር በጋራ ለመስራትና ለኢትዮጵያ ህልውና መጠበቅ እስከ ግንባር ድረስ ለመዝመት ቁርጠኛ አቋም ማስቀመጡንም አረጋግጠዋል።
 
በህልውና ዘመቻው በመሳተፍ ኢትዮጵያን ለማዳን መስዋዕትነት ለመክፈል መዘጋጀታቸውን የገለጹት ደግሞ የኢትዮጵያ ሕዝቦች አብዩታዊ ፓርቲ /ኢህአፓ /የህዝብ ግንኙነት ኃላፊ መጋቤ ብሉይ አብርሃም ናቸው።
 
ኢህአፓ ኢትዮጵያን የማዳን ጽኑ አቋም እንዳለው ጠቅሰው÷ ሁሉም ኢትዮጵያዊያን የጠቅላይ ሚኒስትሩን ፈለግ በመከተል የህልውና ዘመቻውን በድል ለማጠናቀቅ ሚናቸውን መወጣት እንደሚገባ አስገንዝበዋል።
 
በኢትዮጵያ አሻንጉሊት መንግስት ለመመስረት ለቋመጡ አካላት ትምህርት መስጠት እንደሚገባም አመላክተው÷በድል ተመልሰን ለዓለም አቀፉ ማህበረሰብ ኢትዮጵያ አሸናፊ መሆኗን ዳግም እናሳያለን ነው ያሉት።
 
የእናት ፓርቲ ምክትል ፕሬዝዳንት ዶክተር ሰይፈስላሴ አያሌው በበኩላቸው÷ፓርቲያቸው በኢትዮጵያ ላይ የተደቀነውን የሕልውና አደጋ ለመመከት የሚያደርገውን ድጋፍ አጠናክሮ እንደሚቀጥል ገልጸዋል።
 
የጠቅላይ ሚኒስትሩ ውሳኔ ሂደት ቀያሪና የዓድዋ ድልን የሚያድስ ነው ብለው እንደሚያምኑ መግለጻቸውን ኢዜአ ዘግቧል።
 
አካባቢዎን ይጠብቁ!
ወደ ግንባር ይዝመቱ!
መከላከያን ይደግፉ!
ወቅታዊ፣ትኩስ እና የተሟሉ መረጃዎችን ለማግኘት፡-
ድረ ገጽ፦ https://www.fanabc.com/
ፌስቡክ፡- https://www.facebook.com/fanabroadcasting
ዩትዩብ፦ https://www.youtube.com/c/fanabroadcastingcorporate/
ቴሌግራም፦ https://t.me/fanatelevision
ትዊተር፦ https://twitter.com/fanatelevision በመወዳጀት ይከታተሉን፡፡
ዘወትር፦ ከእኛ ጋር ስላሉ እናመሰግናለን!
You might also like

Leave A Reply

Your email address will not be published.