Fana: At a Speed of Life!

በአማራ ክልል የተፈናቀሉ ወገኖችን ለመደገፍ የተለየ ትኩረት እንዲሰጥ ተጠየቀ

አዲስ አበባ፣ ህዳር 15፣ 2014 (ኤፍ ቢ ሲ) በአማራ ክልል አሸባሪው ህወሓት በከፈተው ጦርነት የተፈናቀሉ ወገኖችን ለመደገፍ መንግስትና ረጅ ድርጅቶች የተለየ ትኩረት እንዲሰጡ ተጠየቀ።

የክልሉ ከፍተኛ አመራሮች ከፌደራል ሚኒስቴር መስሪያ ቤት ኃላፊዎች ጋር በወቅታዊ ጉዳዮችና በሰብአዊ ድጋፍ ዙሪያ ዛሬ በባህር ዳር ከተማ እየመከሩ ነው።

የአማራ ክልል አደጋ መከላከልና ምግብ ዋስትና ማስተባበሪያ ኮሚሽን ኮሚሽነር ዘላለም ልጃለም እንዳስታወቁት ÷ አሸባሪው ህወሓት በፈጠረው ጦርነት በክልሉ ሰብአዊ፣ ማህበራዊና ኢኮኖሚያዊ ችግሮች ተከስተዋል።

ከህልውና ጦርነቱ በፊት አሸባሪው በአማራ ክልል በቅማንት፣ በኦሮሞ ብሔረሰብ ዞንና በቤኒሻንጉል ጉሙዝ ክልል በፈጠራቸው ግጭቶች እንዲሁም አሁን ላይ በክልሉ በከፈተው ጦርነት በጠቅላላው ከ2 ነጥብ 1 ሚሊየን በላይ ወገኖች መፈናቀላቸውን ኮሚሽነሩ ተናግረዋል።

አሸባሪው እስካሁን በወረራ በያዛቸው አካባቢዎችም ከ7 ሚሊየን በላይ ህዝብ በምግብና መድሃኒት እጥረት ችግር ውስጥ መሆኑን አመላክተዋል።

“በአሁኑ ወቅት የተፈናቃዮች ቁጥር እየጨመረ ከመምጣቱ ጋር ተያይዞ ችግሩ ከሰብአዊ ወደ ማህበራዊ ቀውስ እየተሸጋገረ መጥቷል” ብለዋል።

በመሆኑም መንግስትና ረጅ ድርጅቶች ለችግሩ የተለየ ትኩረት ሊሰጡ እንደሚገባ ኮሚሽነሩ ጠይቀዋል።

የአማራ ክልል ርዕሰ መስተዳድር ዶክተር ይልቃል ከፋለ በበኩላቸው ÷ ጦርነቱ በድል እስካልተቋጨ ድረስ ችግሩ እየሰፋ መሄዱ እንደማይቀር ጠቁመዋል።

ሚኒስቴር መስሪያ ቤቶች በክልሉ ላይ እየደረሰ ያለውን ጫና ከግምት ውስጥ ያስገባ ምላሽ መስጠት እንዳለባቸውም አስገንዝበዋል።

የዓለም አቀፍ ረጅ ድርጅቶችም ችግሩ ወዳለባቸው አካባቢዎች ገብተው ተፈናቃዮችን ሊደግፉ ይገባል ነው ያሉት።

በምክክር መድረኩ ላይ የሰላም ሚኒስትሩ አቶ ብናልፍ አንዷለም፣ የጤና ሚኒስትሯ ዶክተር ሊያ ታደሰ፣ የሴቶችና ማህበራዊ ጉዳይ ሚኒስትሯ ዶክተር ኤርጎጌ ተስፋዬ፣ የብሔራዊ አደጋ ስጋት አመራር ኮሚሽን ኮሚሽነር ምትኩ ካሳና ሌሎች የክልሉና የፌደራል የስራ ሃላፊዎች መገኘታቸውን ኢዜአ ዘግቧል፡፡

 

አካባቢዎን ይጠብቁ!
ወደ ግንባር ይዝመቱ!
መከላከያን ይደግፉ!
ወቅታዊ፣ትኩስ እና የተሟሉ መረጃዎችን ለማግኘት፡-
ድረ ገጽ፦ https://www.fanabc.com/
ቴሌግራም፦ https://t.me/fanatelevision
ትዊተር፦ https://twitter.com/fanatelevision በመወዳጀት ይከታተሉን፡፡
ዘወትር፦ ከእኛ ጋር ስላሉ እናመሰግናለን!

 

You might also like

Leave A Reply

Your email address will not be published.