አዲስ አበባ፣ ሚያዝያ 19፣ 2015 (ኤፍ ቢ ሲ) የደቡብ ምዕራብ ኢትዮጵያ ህዝቦች ክልል ምክትል ርዕሰ መስተዳድር ነጋሽ ዋጌሾ (ዶ/ር) በአማራ ክልል ብልጽግና ፓርቲ ቅርንጫፍ ጽ/ቤት ኃላፊ ግርማ የሺጥላ ግድያ የተሰማቸውን ሃዘን ገለጹ፡፡
ምክትል ርዕሰ መስተዳድሩ ፥ “በወንድሜ በአቶ ግርማ የሺጥላ ድንገተኛ ሞት የተሰማኝ ሐዘን በጣም ጥልቅ ነው” ብለዋል፡፡
አቶ ግርማ በሃሳብ ልዕልና የሚያምኑ፣ ለሀገራዊ አንድነትና ለሕዝቦች ወንድማማችነት የሚታገሉ ኢትዮጵያዊ እንደነበሩም አውስተዋል፡፡
ነጋሽ ዋጌሾ (ዶ/ር) ÷ ለሥራ ባልደርቦቻቸው፣ ለወዳጅ ዘመዶቻቸውና ለቤተሰቦቻቸው መጽናናትን ተመኝተዋል፡፡
በተመሳሳይ የደቡብ ምዕራብ ኢትዮጵያ ህዝቦች ክልል ብልጽግና ፓርቲ ቅርንጫፍ ጽ/ቤት በግርማ የሺጥላ ግድያ የተሰማውን ሀዘን ገልጿል፡፡
በመግለጫውም ፥ ጽንፈኞች በፈጸሙት አስነዋሪ ተግባር የአማራ ክልል ብልፅግና ፓርቲ ቅርንጫፍ ጽ/ቤት ኃላፊና የብልፅግና ስራ አስፈጻሚ ኮሚቴ አባል የሆኑት ወንድም ግርማ የሺጥላ ህይወታቸው ማለፉን ሲንሰማ ከፍተኛ ሀዘን ተሰምቶናል ብለዋል ::
ጽንፈኝነት ለማንም የማይጠቅም የዘመናችን በሽታና የአንድነታችን ነቀርሳ ነው ያለው ቅርንጫፍ ጽ/ቤቱ ፥ ሁላችንም አጥብቀን ልንታገለውና ልንኮንነው ይገባል ብሏል።
አቶ ግርማ የሺጥላ ለአማራ ክልል እንዲሁም ለሀገራቸው ህዝቦች ልማትና እድገት ደከመኝ ታከተኝ ሳይሉ ሲለፉና ሲታክቱ የነበሩ ታማኝ የህዝብ ልጅ እንደነበሩም አንስቷል፡፡