Koroonah Vayresih Fokkaaqo Ayroh Addat 14 Gufsoonuh Taama Akkuk Geytimta – Naharsi Malak Dr. Abiy Acmad
Addis Ababa, Waysu 01, 2012 ILL (FBC) Itiyoppiyal Koroonah Vayresih Fokkaaqo 1 Ayroh Addat 14 Alfi Gufsoonuh Taama Akkuk Geytimtam Naharsi Malak Dr. Abiy Acmad Qaddoose.
Ummattah Awlaytiitih Malah Buxa, Naharsi Malak Dr. BAiy Acmad Edde Geytimak 5hle Baxsa Le Daffeyna Gexsen.
Tama Daffeynal, Ummattah Awlaytiitih Malah Buxah Adoytiitik UguttehTan Esseroora Naharsi Malaakal Ugseenih Gacsa Kee Addaffakot Keenih Abe.
Agat Caddoh Milaaguy, Cudud Dariifal Koroonah Vayresih Kalalul Akkuk Geytimta Taamoomih Caagiidal, Agat Caddoh Dooro Kee Tahat Arawah Tan Caagiidal Tonnah Buqre Kee Alaatitte Xayyoosiyyat Arawah Tan Esseroora Ugutteh Ten.
Dr. Abiy Yeceh Yan Raddil, Agat Caddol Koroonah Vayresik Fokkaaqo Dudda 1 Ayroh Addat 14 Alfi Gufsoonuh Taama Akkuk Geytimtam Yiysixxige.
Koroonah Vayres Kaxxaam Umaa Gidbi Taqabi Kataasam Duudah Yanim Kassiisaak, Tama Vayres Baad Caddol Kaxxa Taqabi Kataaseh Geytimam Yiysixxige.
Aham Fanah Afrikal 185 Alfiik Daga Yakke Mari Koroonah Vayresit Yibbixsimeenih Geytimaanam Kassiiseh Yan Naharsi Malak Dr. Abiy Acmad, Itiyoppiyal Koroonah Vayresih Fixix Ayrook Ayro Ossimak Geytimam Qaddoose.
Aham Fanah 2 Alfi 20 Yakke Mari Koroonah Vayresit Yibbixsimeh Geytimam Kassiisaak, 27 Numih Qawwaddi Edde Yewqeh Geytimam Yiysixxige.
Tama Dalka Inkih Tan Agat Caddol Fixiixak Geytimam Kee Tamakkeh Fanak Addis Ababal Fayya Le Caddol Fayya Iyyeh Yanim Warse.
Koroonah Vayres Baadal Maddur, Ayyuntiino Kee Qaafiyat Ludda Kaxxam Biyaakeh Geytima.
Koroonah Vayresit Arawah Anuk, Fokkaaqo Kee Deeliyyi Fanteenitih Dudda Gablusaanamih Taama Akkuk Geytimtam Qaddooseh Yan Naharsi Malak Dr. Abiy Acmad, 3 Alsih Addat 31 Daga Takke Laboratoori Fanteenit Akah Xissimtannah Tekkeh Tanim Kassiise.
A Ixxima Waysu Kee Ximoli Alsih Addat Ossimelem Kassiisaak, Ximoli Alsih Addat 1 Ayroh Addat 14 Alfi Yakke Mara Fokkaaqaanamih Dudda Allenno Axcuk Yiysixxige.
54 Takke Dayli Fanteenit Bicteh Tanim Kassiiseh Yan Naharswi Malak Dr. Abiy, Astooti Yubulleh Yan 30 Alfi Yakke Mara, Iro Baaxok Tamaate 45 Alfi Takke Itiyoppiyah Xaylo Tonnah Koroonah Vayres Leh Tan 17 Alfi 500 Yakke Marah Takke Deeliyyi Fanteena Bicteh Tanim Qaddoose.
Koroonah Vayresit Arawah Anuk Taturteh Tan 3 Alsitteh Addat Geytimeh Yan Duddi Qaso Kee Kalah Tan Luddittel Digga Luk Taamitaanamal Mango Milaagi Geytimak Yenem Kassiise.
Tama Dalkat Arawah Anuk Inkih Tan Rakaakayitte Kee Magaalol Xiinissoh 400 Miliyoonih Birrih Qokol Yekkeh Yanim Kassiisak, Doolat Koroonah Vayres Wagittaamal Tanih Tan Oytitte Aaqure Kal Ayyuntah Qaddoosak Geytimam Yiysixxige.
Naharsi Malak Tamaha Lih Abeh Yan Addaffakootul Iyyeemih, Koroonah Kalalih Taamoomil Mihratleela Katuk Taturta Farmo Abinal Asisaanam Faxximtam Yescesse.
Ossetinah Koroonah Vayres Madduurul Kataasam Duuda Taqabi Yaynukuseenim Faxximtam Qaddoose.