ጤና ሚኒስቴር “ማስተርካርድ ዌልነስ ፓስ” የተሰኘ የጤና መረጃ አያያዝ መተግበሪያ ይፋ አደረገ
አዲስ አበባ፣ ሰኔ 10፣ 2014 (ኤፍ ቢ ሲ) ጤና ሚኒስቴር “ማስተርካርድ ዌልነስ ፓስ” የተሰኘ ዲጂታላይዝድ የጤና መረጃ አያያዝ መተግበሪያ ይፋ አደረገ፡፡
የጤና ሚኒስትር ዶክተር ሊያ ታደሰ በማህበራዊ ትስስር ገጻቸው ባሰፈሩት ጽሑፍ ÷የዲጂታላይዝድ ጤና መረጃ አያያዝ መተግበሪያ በጤናው ዘርፍ የሚስተዋለውን የመረጃ አያያዝ ችግር እንደሚቀርፍ ገልጸዋል፡፡
መተግበሪያውን ወደ ስራ ለማስገባት ከማስተር ካርድ፣ ጂ ኤ ቪ አይ እና ጄ ኤስ አይ ከተሰኙ ተቋማት ጋር ስምምነት መፈረሙንም ነው ሚኒስትሯ የገለጹት፡፡
“ማስተርካርድ ዌልነስ ፓስ” የተሰኘው ይህ መተግበሪያ÷ ለ15 ወራት የሚቆይ የሙከራ ምዕራፍ በመላ አገሪቱ በተመረጡ የጤና ተቋማት ላይ የሚተገበር እንደሆነ ተመላክቷል፡፡
መተግበሪያው ያለ ኢንተርኔት አገልግሎት የጤና መረጃዎችን መመልከት እንደሚያስችልም ነው የተጠቆመው፡፡