በአዲስ አበባ የዋጋ ጭማሪ በማድረግ እርምጃ የተወሰደባቸው ተቋማት 767 ደረሱ

ባለፉት ቀናት በተዋቀረው ግብረ ሀይል ውጤታማ ስራ የተከናወነ ሲሆን፥ እስከ ዛሬ ድረስ ከ14 ሺህ በላይ የንግድ ተቋማት ላይ ቁጥጥር እና ክትትል መደረጉን የከተማ አስተዳደሩ ፕሬስ ሴክሬታሪያት ፅህፈት ቤት መረጃ ያመለክታል።

በቁጥጥሩም 11 የምርት አይነቶች እና 12 ፋርማሲዎችን ጨምሮ በ767 የንግድ ተቋማት ላይ እርምጃ መወሰዱን የአዲስ አበባ ከተማ አስተዳደር ንግድ ቢሮ ኃላፊ አቶ አብዱልፈታ የሱፍ ተናግረዋል።

ተገቢ ያልሆነ ዋጋ ጭማሪ ለማድረግ፣ በጋራ ዋጋ የመወሰን፣ ምርት የማከማቸት እና የመደበቅ እንዲሁም በተለያዩ ምርቶች የዋጋ ንረትና ሰው ሰራሽ እጥረት በሚያስከትሉ ስራዎች በተሰማሩ የንግድ ድርጅቶች ላይ እርምጃ መወሰዱንም ኃላፊው ገልጸዋል።

እርምጃ ከተወሰደባቸው መካከል ወፍጮ ቤቶች፣ የአትክልትና ፍራፍሬ ንግድ ተቋማት፣ ሸቀጣ ሸቀጥ ንግድ ተቋማት፣ ፋርማሲዎች እና በበርበሬ ንግድ የተሰማሩ ነጋዴዎች መሆናቸውንም አመላክተዋል።

ችግር በፈጠሩ ነጋዴዎች ላይ እንደጥፋታቸው አይነት ከአስተዳደራዊ ጀምሮ እስከ ማሸግ የደረሰ እርምጃ እየተወሰደባቸው መሆኑንም ነው የቢሮ ኃላፊው የተናገሩት።